Аргентина терма жамоаси ҳужумчиси Лионель Мессининг отасининг соғлиғида муаммолар юзага келди. "Vía País" нашрининг журналист Эдуардо Файнманнга таяниб хабар беришича, Хорхе Месси жиддий соғлиқ муаммоларини бошдан кечирмоқда, унинг аҳволи шу ҳафта ёмонлашган. Таъкидланишича, айнан шу ҳолат Мессининг ЖЧ-2026 доирасидаги Жазоирга қарши ўйинда (3:0) киритган илк голидан сўнг ҳиссиётларга берилишига сабаб бўлган. Эслатиб ўтамиз, 17-дақиқада Жазоирга қарши ўйинда биринчи голни урганидан сўнг, Месси йиғлаб юборган ва кўз ёшларини футболкаси билан артганди. Ўйиндан кейин аргентиналик футболчи шундай деганди: "Бу футбол билан боғлиқ эмас. Мен сўнгги бир неча кунни қийинчилик билан ўтказдим".
