"Англиянинг Гана билан ўйинидан кейин ҳаммамиз бироз хотиржам бўлишимиз керак. Мен бундай вазиятларни бошдан кечирганман ва аниқ айта оламанки, Жаҳон чемпионати бошидаги битта ўйин ҳеч нарсани ҳал қилмайди. Чоршанба куни жуда кўп салбий фикрларни эшитдим, лекин вазиятга бошқача қараш керак деб ўйлайман.
Ўйин ажойиб бўлдими? Йўқ. Кўнгилни қолдирдими? Албатта. Аммо баъзилар шундай фикр билдиряптики, гўёки Англиянинг имкониятлари бир зумда йўқолиб қолгандек. Учта Жаҳон чемпионатида иштирок этган инсон сифатида айтаманки, бу асло бундай эмас.
Мухлислар ва экспертларнинг энг катта хатоси — ҳар бир ўйин бир хил сценарий бўйича ўтиши керак, деб ўйлашидир. Англия Хорватияга тўртта гол урса, кейин Ганага қарши ҳам шундай бўлишини кутишади. Футболда, айниқса йирик турнирларда, бундай бўлмайди.
2002 йилда биз биринчи ўйинда Швеция билан дуранг ўйнадик ва ҳамма ҳайратда қолганди. Бир неча кундан кейин Аргентинани мағлуб этдик ва тўсатдан ҳамма Жаҳон чемпионлигини гапира бошлади. Кейин Нигерия билан 0:0 ўйнадик ва танқидчилар яна қайтишди.
1998 йилда Руминияга ютқазганимиздан кейин ҳам кўпчилик ҳамма нарсадан шубҳалана бошлаганди. Кейин эса Колумбияни мағлуб этдик.
Ҳатто сўнгги Жаҳон чемпионатида Аргентина биринчи ўйинда Саудия Арабистонига мағлуб бўлди, аммо якунда кубокни қўлга киритди. Шунинг учун битта омадсиз ўйиндан кейинги бу қадар салбий муносабатни тушуниш мен учун қийин", — деди Оуэн.
