Аввалроқ Марокаш ҳал қилувчи баҳсни Касабланкадаги янги стадионда ўтказишга эришиш учун ҳаракат қилаётгани хабар қилинган эди.
"Финал шу ерда ўтиши шарт. Ариза Испания ва Португалиядан чиққан, шундан сўнг бизга Марокаш қўшилган. Шу билан бирга, ўйинлар бошқа мамлакатларда (Уругвай, Аргентина ва Парагвайда) ҳам бўлиб ўтади.
Наҳотки испан футболи қилаётган шунча ишлардан кейин биздан финални тортиб олишмоқчи бўлса? Эркаклар ва аёллар терма жамоаларимиз, олимпия жамоамиз муваффақиятлари ҳамда Европа чемпионатидаги иштироклардан сўнг кимдир энг яхши стадионлар, ривожланган инфратузилма ва йирик тадбирларни ўтказиш тажрибасига эга шаҳарни финалдан маҳрум этишга журъат қила оладими?
Испан футболига бу борада рад жавобини бериш — майдакашлик. Ҳисоблайманки, жаҳон чемпионати финалига Испания мезбонлик қилиши лозим. Агар бундай бўлмаса, турнирни ташкил этишда қандай роль ўйнаётганимиз ҳақида ўйлаб кўришимиз керак. Ҳамма нарсанинг чегараси бор. Биз Португалия билан биргаликда ариза тайёрлаганмиз, бизда энг яхши инфратузилма мавжуд. Объектларни баҳолашдан сўнг ФИФА бизга, хусусан, 'Сантьяго Бернабеу' ва 'Метрополитано' стадионларига энг юқори баҳоларни берди. Қолаверса, биз жаҳон чемпионларимиз. Яна нимани исташ мумкин?
Бу Испанияга нисбатан очиқдан-очиқ ҳақоратдир. Марокашга ачинаман, лекин менимча, ҳамма нарсанинг чегараси бор. Финал Мадридда ўтса хурсанд бўлардим ва шаҳримиз номзодини ҳимоя қиламан. Мадрид ҳал қилувчи баҳсни қабул қилиши керак. Аммо бу Мадрид бўлмаган тақдирда ҳам, фақат ўз вариантимда туриб олмайман — майли, финал Испанияга, бу ҳолатда Барселонага насиб этсин", — деди Мартинес-Альмейда.
