The Sun нашри маълумотларига кўра, аргентиналик мутахассис футболчиларни учрашувларнинг эртасига тикланиш машғулотларини ўтказиш учун Каррингтондаги машғулот базасига етиб келишга мажбур қилмоқчи.
Майкл Кэррик даврида ўйинчилар баҳслардан сўнг деярли ҳар доим дам олиш кунига эга бўлишарди. Почеттино жамоанинг жисмоний тайёргарлигини яхшилаш мақсадида ушбу амалиётдан воз кечмоқчи.
Қайд этилишича, жорий мавсумда МЮ АПЛда футболчилар босиб ўтган умумий масофа бўйича 19-ўринни, тезкор югуриш масофаси бўйича 17-ўринни ҳамда ўртача максимал тезлик борасида 19-поғонани эгаллаб турибди.
Почеттинога ўйинчиларнинг жисмоний ҳолати устида ишлашда АҚШ терма жамоасида ҳам худди шундай лавозимда фаолият юритган тўнғич ўғли Себастьяно ёрдам беради.
Аргентиналик мураббий қўл остида тўп тепган "Тоттенхэм" собиқ ҳимоячиси Тоби Алдервейрелд манкунианликларни юқори юкламалар кутаётгани ҳақида огоҳлантирди.
"Энг аввало, у бизни жуда чидамли қилиб тарбиялаганди. Мавсумолди тайёргарлик ниҳоятда шафқатсиз ўтган. Юқори прессинг, баланд ҳимоя чизиғи ва динамик ўйинга асосланган унинг футболи учун кўп югуриш талаб этилади. Интенсив тезланишларга бардош бера олиш шарт.
Футболчилар бу мутлақо бошқа даража эканини дарҳол ҳис қилишади", — деди Алдервейрелд BBC нашрига.
Эслатиб ўтамиз, Почеттино Кэррик истеъфога чиқарилганидан сўнг "Манчестер Юнайтед" бошқарувини қўлга олди. Аргентиналик мутахассис қўл остидаги жамоанинг илк ўйини 22 ноябрь куни "Ливерпуль"га қарши бўлиб ўтади.
