Аввалроқ El Debate журналисти Томас Гонсалес-Мартин Испания чемпионати раҳбари лига клубларидан бирига ҳужум қилмаслиги кераклигини таъкидлаган эди.
Бунга жавобан Тебас ижтимоий тармоқларда катта пост эълон қилиб, унда "Реал" президенти Флорентино Перес ва клуб телевидениеси томонидан Ла Лигага нисбатан билдирилган танқидларни эслатиб ўтди.
Хусусан, функционер Переснинг 2026 йил май ойида айтган сўзларини келтирди: "Бизнинг доимий душманимиз Ла Лига бўлиб қолмоқда". Ўшанда мадридликлар президенти кўпроқ чемпионлик унвонларини қўлга киритиши мумкин бўлганини, бироқ "қолганларини ундан ўғирлаб кетишганини" даъво қилган эди.
Тебас, шунингдек, "Реал" раҳбарияти Ла Лигани тизимли коррупция ва мусобақа натижаларини манипуляция қилишда айблаганини, Real Madrid TV эса чемпионатни бир неча бор "Негрейранинг ифлос лигаси" деб атаганини ёдга солди.
"Қандай қулай доктрина: мусобақани коррупциялашган, унинг раҳбарларини душман, бошқарувни эса 'Мадрид'га қарши операция сифатида кўрсатиш мумкин. Аммо кимдир чемпионатни ҳимоя қилса, бу клубга қилинган ҳужумга айланиб қолади.
Мусобақа нуфузини ва унинг барча иштирокчилари манфаатларини ҳимоя қилиш менинг вазифамга киради. Жумладан, уларни 'Реал' президенти шубҳа остига қўйган пайтда ҳам. Клубнинг тарихи ва аҳамияти эътирофга лойиқ, бироқ бу танқиддан иммунитет бермайди ва бошқаларни сукут сақлашга мажбур қилмайди.
Шунингдек, Флорентино Переснинг доимий равишда 'Реал' билан тенглаштирилишини қабул қила олмайман. Унинг даъволарини рад этиш, хатти-ҳаракатларини танқид қилиш ёки клуб телевидениесига жавоб бериш — футболимиз қандай бошқарилаётгани ҳақидаги мунозаранинг бир қисмидир.
Ла Лига мусобақанинг ўзи ҳамда ўз тарихи, мухлислари, ҳуқуқ ва манфаатларига эга бўлган ва худди шундай ҳурматга лойиқ бошқа клублар мавжудлиги туфайли маъно касб этади", — деб ёзди Тебас.
