"Тулкилар" охирги пайтларда АПЛ ва Чемпионшип ўртасида сарсон бўлиб қолмоқда. Аммо "Лестер" эгаси Айаватт Шриваддханапрабха учун клубни тарк этиш муаммолар ечими эмас.
Айаватт клубни 2018 йилда отаси Вишай авиаҳалокатда фожиали тарзда ҳалок бўлганидан кейин қабул қилиб олган. Шундан бери вазиятни барқарорлаштириш осон бўлмади, аммо Айаватт учун энг муҳими — отаси бошлаб кетган ишни давом эттириш.
"Менимча, 2012 йил август ойида отам билан биринчи бор бу ерга келган кунимиздан бошлаб режа бўйича иш тутганмиз, футболни севганмиз ва бу клубни яхши кўрганмиз. Ҳозир ҳам худди шу нарсани ҳис этаман. Мен футболга ошноман ва 25 ёшимда берган биринчи интервьюмда айтганимдек, бу ишни узоқ муддат қилиш ниятидаман. Клубни сотиш ечим эмас.
Отам вафот этганидан кейин ва биз Англия Кубогини ютганимизда, ўйлайманки, унинг учун жуда кўп иш қилдим. Албатта, бу ҳеч қачон етарли бўлмайди, аммо мен унинг бу клубни яхши кўрганини биламан. Унинг режаси қандай бўлганини биламан ва худди шу ишни давом эттиришни истайман.
Мен бу ерда бошлаган барча ишларни якунлаганимга ишонч ҳосил қилмасдан туриб кетолмайман. Ҳозир мен учун энг муҳими, клуб яхши ҳолатда бўлишини таъминлаш. Мен ҳали ҳам бу жойни яхши кўраман ва клуб яна муваффақиятли бўлишини хоҳлайман", – деди Шриваддханапрабха.
"Тулкилар" 2024-2025 йилги мавсумда АПЛга янги чиққан жамоа сифатида чемпионатни 18-ўринда якунлаб, АПЛдан тушиб кетди.
Чемпионшипда ҳам ишлар унчалик яхши эмас: "Лестер" 29 ўйиндан сўнг 14-ўринда бормоқда.
Тўғридан-тўғри юқори лигага чиқиш ҳақида гапириш қийин, аммо жамоани плей-офф ҳудудидан бор-йўғи олти очко ажратиб турибди.
