"Бугун ниҳоят ғалаба қозондик. "Насаф"ни мағлуб этиш катта иш. Йигитларга ҳам раҳмат. Ўйинга тайёрлаган режамиз тўғри бажарилди. Муҳаббатдан нафратгача бир қадам. Ўтган турда "Сўғдиёна"ни мағлуб эта олмагандик. Олдинда ҳали яна ўйинлар кўп. Ҳар бир очко учун курашамиз. Халқимизни яқинлашиб келаётган байрам билан қутлайман", - дея гап бошлади Жамшид Саидов.
- Лутка Раткович қайдномада йўқ эди. Шунингдек, Кенжабоев майдонда оқсоқланиб юрди...
- Лука машғулотлардан бирида жароҳат олди ва қайдномадан тушиб қолди. Кенжабаев ҳали даволанмоқда. У тўлиқ тиклангани йўқ. Дўхтирлар унинг ҳолатини назорат қилиб боришмоқда. Шунинг учун ҳам Кенжабоев фақатгина 10-15 дақиқа ўйнамоқда.
- Сўнгги 15 дақиқада 3та ўзгаришни амалга оширдингиз, аммо ўйин кучайгани йўқ. Агар ўйин майдонга тушган футболчилар ўйин суръатига таъсир ўтказмаса, ўзгаришлар қилишнинг нима кераги бор?
- Футболчилар иккинчи бўлим охирига бориб бироз чарчаб қолишади. Буни биласиз. Тўғри, футболчи майдонга тушиб ўйинни кучайтириши керак. Лекин ҳар бир футболчи ҳам майдонга тушиб, ўйин темпига қўшилиб кета олмайди. Шунинг учун шундай бўлиб қолди. Ўйин якунида биз беш нафар ҳимоячи билан ўйнай бошладик.
- Статистикага таянадиган бўлсак, ўринбосарлар жамоаси ғалаба қозонган турда асосий жамоа катта эҳтимол билан мағлуб бўлади. Бу сафар ушбу қоида ишламади. Ушбу ҳолатга қандай фикр билдирасиз?
- Мен ушбу факторларга эътибор бермайман(жилмайиб). Сиз статистикага кўп эътибор берасиз. Мен эса унчалик эмас. Ўринбосарлар жамоасининг асосий мақсади яхши ёш футболчиларни таъминлаб бериш. Ҳар бир таркиб ҳар доим ғалаба қозонишга интилиши керак. Ўринбосарлар ва асосий жамоа.
- Уч мавсум аввал сиз эндигина "Қизилқум" жамоасига келганингизда, жамоа оқ либосда майдонга тушиб, "Металлург"га мағлуб бўлган эди. Мен ўшанда жамоамиз номи "Қизилқум" деб айтиб ўтган эдим...
- Эсимда. Ҳар хил либос бўлади. Уй либосимиз қизил, сафар либосимиз эса оқ ёки бошқа ранг бўлиши мумкин-ку.
- Ҳозир эса буни регламентга бириктириб қўйишди...
- Кўряпсизми, сизнинг эътирозингизни инобатга олишибди(кулади).
- Таянч ярим ҳимоячиси Шаҳзод Туроповнинг ўйинига қандай баҳо берасиз?
- Унга имконият беряпмиз. Ҳаракати ёмон эмас. Кичик жароҳат олиб қолди ва шунинг учун уни захирага олдик. Ўйиндан ўйинга ўсиб боряпмиз. Ҳали жамоа тўлиқ киришиб кета олмади. Трансферлар ойнасида жамоага келиб қўшилганлар ҳам бор.
