- Ўйин ҳақида фикрингиз?
- Оддий бўлмаган, шу билан бирга қизиқарли баҳс гувоҳи бўлдик. Бир нечта вазият яратиб фойдалана олмадик, битта гол ўйин тақдирини ҳал қилди ва биз мағлубиятга учрадик. Футболда шунақа: сен урмасанг, сенга уришади. Киритган голимизни нима учун ҳисоблашмади, билмайман. Ўйин учун йигитлардан хафа эмасман. Мухлисларимизга ҳам раҳмат, бизни охиригача қўллаб туришди. Энди кейинги баҳсга ҳозирлик кўрамиз.
- "Насаф" ва "Бухоро"га қарши ғалабадан сўнг бу ўйинда нима етишмади?
- Ҳамма нарса яхши бўлди, фақат вазиятларни голга айлантира олмадик. Ҳар икки бўлимда футболчиларимиз жароҳат олишди, бу ҳам ўйинга таъсир кўрсатди. Йигитлар ғалаба учун қўлдан келганча ҳаракат қилишди.
- Афтидан "Қизилқум" аввалги баҳсларда кўп куч йўқотган. Бугун шунинг таъсири билингандек.
- Ўйинлар ораси қисқа, балки бу ҳам тикланишга халақит бераётгандир. Барибир ўз таъсирини кўрсатяпти.
- Бугунги ўйинда ҳакамлик борасида фикрингиз? Ҳисобга олинмаган гол бўйича нима дея оласиз?
- Мен ҳакамларни муҳокама қилишни ёқтирмайман. Уларда қўмита бор ва ўйин қандай бошқарилганини ўрганиб чиқишади. Биз видеотакрорни ўзимиз учун кўрамиз.
- Жамоангиз иккита ғалабани уйда қўлга киритди. Лекин сафар баҳсларида ўзини кўрсата олмаяпти.
- Албатта, бу ҳам таъсир қилади. Бекорга уйда деворлар ҳам ёрдам беради дейишмайди. Лекин бугун бу ерда ёмон ўйин кўрсатмадик, охиригача курашдик.
- Ҳисобга олинмаган гол қаттиқ таъсир қилдими?
- Таъсир қилди, лекин эътибор берган бўлсангиз, бўшашмадик. Ҳужум қилишдан тўхтамадик. Устунлик рақибга ўтгандир, аммо биз ҳам қараб турмадик. Мағлубият балки руҳият билан боғлиқдир.
