- Ўйин ҳақида фикрингиз?
- Учрашув яхши кечди, ўйин темпини ушлаб туриш ҳам яхши бўлди. Афсуски, икки очко йўқотдик деб ўйлайман. Қарши ҳужумга чиқиб вазиятлар яратдик, лекин фойдалана олмадик. Йигитларга ҳаракат учун раҳмат айтаман. Энди кейинги баҳсга ҳозирлик кўрамиз.
- Барча ҳужумлар қанотлар орқали ташкил қилиняпти, лекин тўп марказга кўчганда умуман ўйин қовушмаяпти. Ўртада яхши ҳаракат қиладиган футболчилар кўринмаяпти. Тўп ўртада йўқотиляпти ва бутун ҳужум чиппакка чиқяпти.
- Биз бу ўйинга ўз режамиз асосида тайёргарлик кўргандик. Тўғри, аксар ҳужумларимиз қанотлар орқали амалга ошди, аммо тўп ўртага узатилганда ҳужумчиларимиз улгурмай қолишди. Тўп назорати кўпроқ рақибда бўлди, шу боис қарши ҳужум вариантини қўлладик. Рақиб қандай ўйин намойиш этишини билардик ва бунга тайёр эдик. "Сурхон" деярли вазият ярата олмади. Бизда эса вазиятлар бўлди, фақат ҳал қилувчи зарбани бера олмадик.
- ФИФА кунларида баъзи жамоалар 2-3та ўртоқлик учрашуви ўтказишди. "Қизилқум" эса фақат битта ўйин билан чекланди.
- Биз географик жиҳатдан анча узоқдамиз, шу боис ўзимизга яқин "Бухоро" билан ўйнадик. Ўйин тўртта таймдан иборат бўлди. Баъзи футболчиларимиз жароҳат сабаб майдонга туша олишмади.
- "Қизилқум" яна тўрт очко олса Лигадаги ўрнини сақлаб қолиши мумкин.
- Буни ҳисоблаб кўрдингизми?
- Мен бу билан шуғулланмайман, лекин тўрт очко етишини биламан. Жамоа бугун ютганида икки очко керак бўларди. Энди тўрт очко керак бўляпти.
- Олдинда 7та тур бор ва қолган учрашувларда керакли очколарни қўлга киритишга ҳаракат қиламиз.
