- Ўйин ҳақида фикрингиз?
- Жуда яхши, томошабоп ўйин бўлди. Бугунги рақимиз тўп билан ўйнашни хуш кўрадиган жамоа, "Лочин" аввалги ўйинларда ҳам тўп билан муомала қилиб, позицион ҳужумлар уюштириб кўп очко йиққанди. Мақсадимиз рақибга тўпни бериб қўймаслик эди ва буни амалга оширишга ҳаракат қилдик. Одатда бундай жамоалар тўпсиз қолса кўп қийналади. Бугун "Лочин" кўп бор асабийлашиб, ўзи хоҳлаган футболни кўрсата олмади. Биз эса ўйин назоратини қўлга олиб, шунинг эвазига ғалаба қозондик.
- Учинчи гол жуда эсда қоларли бўлди. Буни мавсумнинг энг чиройли голи дейиш мумкинми?
- Асилбек Алиев чиндан ҳам стандартдан жуда чиройли гол урди. Шогирдим бўлгани учун унга бемалол аъло баҳо қўя оламан. Лекин энг чиройли гол эканини кўпроқ мухлислар аниқлагани маъқул.
- "Лочин" билан биринчи даврадаги баҳс 0:0 ҳисобида якун топганди. Бугун эса жамоангиз 3:0 ҳисобида ютуққа эришди. Буни тезкор гол билан изоҳласа бўладими?
- "Лочин" жамоаси таъкидлаб ўтганимдек, биринчи даврада жуда чиройли ўйин намойиш қилганди. Иккинчи даврадаги ҳамма ўйинларини кўриб чиқдим. Кўпроқ тўп назоратига эътибор берадиган жамоа. Ёшларимиз ўйиндан ўйинга кучайиб бормоқда. Биринчи даврада ҳам шу йигитлар эди, лекин уларнинг ўйини анча ўсди. Биз Пролига нафасини олдик, бу йигитлар терма жамоада халқаро учрашувлар ўтказишди. Бу ҳолат барибир футболчиларни ривожлантиради. Ўйлайманки, жамоа сифатида шаклланиб боряпмиз.
- Статистикага қарайдиган бўлсак, фақат "Ғазалкент"га йирик ҳисобда мағлуб бўлгансиз. Қолган ўйинларда кичик ҳисобли мағлубиятлар кузатилган. "Ғазалкент" билан нима учун 0:7 қайд этилган деб ҳисоблайсиз?
- Бу борада кўп гапирдик. Тўғри айтдингиз, "Ғазалкент"дан ташқари ҳеч кимга йирик ҳисобда мағлуб бўлмадик. Кўпинча битта тўп фарқи билан енгилдик. Энди у ўйинда икки нафар футболчимизнинг қизил карточка олиши кўп нарсани ўзгартириб юборганди.
Майдонда икки киши кам қолиб ҳам курашганмиз. Йигитларимиз ёш, қони қайноқ бўлгани учун ҳисобни тенглаштириш мақсадида кўп марта шошилиб олдинга чиқиб кетдик. Баъзан рақибнинг ҳар бир иши ўхшайди, сизда эса аксинча. Ўша учрашувда ҳам шундай бўлганди.
Нимаики бўлса ҳаммаси яхшиликка. Йирик мағлубиятдан кейин футболчилар билан гаплашдик, шундан сўнг ишларимиз яхши томонга юра бошлади. Мағлубиятдан тўғри хулоса чиқарганимиз боис яхши томонга ривожландик. Агар жамоамиз руҳияти билан ишламаганимизда, йигитларга ишонч бермаганимизда бу мағлубият зарарга ишлаши мумкин эди. Ҳозир кўряпмизки, ўша ўйин жамоамиз учун яхши томонга бурилиш нуқтаси бўлган экан.
