- Ўйин ҳақида фикрингиз?
- Жуда аламли мағлубиятга учрадик. Чиройли ўйнаб ютқазиб қўйдик. Биз ҳатто дурангга рози бўлмаслигимиз мумкин эди. Рақиб деряли бир-бирига ўхшаш голлар киритди. Футболчиларимизнинг якка курашларга, узун тўп узатишларга тўлиқ тайёр эмасликлари бугун кўриниб қолди. Лекин позицион ҳужум ва ҳимояда ажойиб ўйин кўрсатдик.
- Жамоангиз сўнгги сонияда тўп ўтказиб мағлуб бўлди ва шунда орқа трибунадаги мухлислардан турли гап-сўзлар бўлди. Сиз эса улар билан тортишиб кетдингиз. Профессионал мураббий учун бу каби ҳолатларга эътибор бериш қанчалик тўғри?
- Энди футбол жуда ҳиссиётларга бой ўйин. Ўйин пайти стрессли ҳолатлар кўп бўлади. Барибир бу ҳам руҳиятга таъсир қилади. Тўғри айтдингиз, мураббий ҳар қандай вазиятда ўзини қўлга ола билиши керак. Мен имкон қадар жамоам яхши ўйин кўрсатаётган маҳал футболчилар руҳиятини туширмасликка ҳаракат қиламан. Орқада турган мухлислардан бири жамоам шаънига ҳақоратли сўзларни ёғдиргани учун тўғриси, мен ҳам чидаб тура олмадим. Чунки шогирдларим бу ўйин билан ҳақоратга лойиқ эмасдилар.
- Ҳатто ўйин охирларида ҳам "ФарДУ" имкониятни бой бераётганди, бироқ камбэк амалга ошириб мағлубиятни ғалабага айлантирди.
- Дарҳақиқат "ФарДУ" яхши жамоа. Айниқса иккинчи даврада жисмоний томондан яхшигина кучайди. Биз буни билардик, шуни билиб ҳам яккакурашларда ютқазиб мағлуб бўлганимиз алам қиляпти. Рақибимиз курашувчан ва охирги дақиқагача курашяпти. Қолаверса "ФарДУ"ни мухлислар жуда яхши қўллаб туришди.
- Ўйиннинг боришига қараб сиз амалга оширган ўзгаришлар жамоа ўйинини кучайтирди деб айта олмаймиз.
- Тўғри таъкидладингиз, буни сезибсиз. Захирадан тушганлар бугун афсуски ўйинни кучайтира олишмади. Бир томондан тўғри тушуниш керак, захирадан тушганлар ўйин амалиёти кам футболчилар эди ва улар бирданига ўйинни кучайтириб юборишга ҳали эрта.
- Мураббийлар ўзаро жанггида бугун ютқазганингизни тан оласизми?
- (кулиб) Агар бу сизни хурсанд қилса, ҳа тан оламан. Чунки чиндан ҳам ютқаздик. Биз натижага кўра мағлуб бўлдик. Лекин шогирдларим кўрсатган ўйиндан фахр туйдим. Ҳали 20 ёшгача тўлмаган йигитлар шундай ҳаракат қилиб кўпчиликни хурсанд этишди. Таркибида олий лигани кўрган футболчиларга қарши тенгма-тенг кураш олиб бордик.
