Фарғоналиклар бош мураббийи Ислом Исмоиловнинг фикрича, жамоа ушбу синовдан бир қатор ижобий хулосалар билан чиқди.
— Аввало, мағлубиятга қарамай, жамоангизнинг "Ал Насср"га қарши ўйинида ижобий жиҳатлар бўлдими?
— "Ал Насср" савиясидаги жамоаларга қарши ўйинлар футболчиларимиз ва мураббийлар штаби учун бебаҳо тажриба ҳисобланади. Биз яккалик маҳорат бўйича фавқулодда юқори сифатга, улкан тажрибага ва энг кичик хатолар учун ҳам жазолаш қобилиятига эга жамоа билан тўқнаш келдик. Натижага қарамасдан, ўйинимизда ижобий жиҳатлар бор эди, айниқса, танлаган тактик услубимизни майдонда қўллашга уринганимиз таҳсинга лойиқ. Шу билан бирга, бу баҳс биз яхшилашимиз лозим бўлган нуқталарни, хусусан, қарор қабул қилиш тезлиги, босим остида ҳаракатланиш ва ўйин давомида диққатни бирдек сақлаб туриш қобилиятини очиб берди. Бу савияда ҳар бир майда деталь катта фарқни юзага келтиради. Бурчимиз — бундан сабоқ чиқариш ва ривожланишда давом этиш.
— Ўйин давомида Криштиану Роналдуни қандай назорат қилишга ҳаракат қилдингиз?
— Роналду — профессионаллик борасида тенгсиз футболчи. У 41 ёшда бўлишига қарамай, ҳамон футболга бўлган ҳайратланарли даражадаги садоқати, ғалаба қозониш руҳияти ва жарима майдончаси ичидаги ҳал қилувчи вазиятларда тўпурарлик қобилиятини сақлаб қолган. Албатта, унинг майдондаги таъсирини камайтириш учун махсус тактик режа тайёрлагандик. Бундай савиядаги футболчига қарши ўйнаганда ҳимояланиш масъулияти фақат бир футболчининг зиммасига тушиши мумкин эмас. Бунинг учун жамоавий тартиб, ҳимоя ва ярим ҳимоя чизиқлари ўртасидаги мувофиқлик, айниқса, унинг тўпсиз ҳаракатларида доимий диққатни сақлаш талаб этилади. Шунга қарамай, Криштиану каби футболчи келтириб чиқарадиган хавфни бутунлай йўққа чиқариб бўлмайди. Сиз пухта тайёргарлик кўришингиз, унга бериладиган бўш ҳудудларни қисқартиришингиз ва қарор қабул қилишини қийинлаштиришингиз мумкин, аммо унинг тажрибаси ва имкониятларни ҳис қилиш қобилияти барибир ҳайратланарли даражада қолмоқда.
— Ўйин давомида Роналду сизни кутилмаган бирор ҳаракати билан ҳайратлантирдими?
— Менда энг катта таассурот қолдирган нарса муайян бир вазият эмас, балки унинг ҳамон ўйинни ўқий олиш қобилияти бўлди: майдонда позиция танлаши, ҳаракатланиш вақтини аниқ топиши ва хавфли бўш ҳудудларни сеза билиши, буларнинг бари йиллар давомида энг юқори савияда тўп тепиш натижасидир. Ўйиндан олдин футболчини таҳлил қилар экансиз, унинг одатий ҳаракатлари ва услубларини аниқлашингиз мумкин, бироқ тажрибали ўйинчилар баҳс давомида вазиятга қараб ўз ҳаракатларини ўзгартира оладилар. Бу эса Криштианунинг узоқ йиллар давомида юқори савияда қолиши сабабларидан биридир. Шунингдек, тажрибаси туфайли у имкониятларни жуда тез пайқайди ва шу сабаб ҳужум қуриш жараёнида бевосита тўп билан иштирок этмаса ҳам хавф туғдира олади. Алоҳида эътирофга лойиқ жиҳат — бу унинг менталитети. Бундай узоқ фаолият давомида юқори савияни сақлаб туриш фавқулодда интизом, юксак мақсадлар ва кундалик тинимсиз меҳнатни талаб қилади.
Мураббий сифатида унинг фаолияти менга шуни эслатадики, истеъдоднинг ўзи ҳеч қачон етарли бўлмайди. Футболчининг меҳнат қилиш тарзи, тайёргарлиги, курашувчанлиги ва ўзидан доимо кўпроғини талаб қилиши истеъдоддан кам аҳамиятга эга эмас. Ёш футболчилар бу ўрнакдан жуда кўп нарсани ўрганишлари мумкин.
— Ўйинда "Ал Насср"нинг айнан қайси футболчиси сизда алоҳида таассурот қолдирди?
— "Ал Насср" сафида ўз яккалик маҳорати билан ўйинга таъсир ўтказа оладиган бир нечта футболчилар бор, шунинг учун бошқаларни четга суриб, фақат биттасини алоҳида ажратиб кўрсатишни истамаган бўлардим. Лекин мени ҳайратга солган нарса жамоанинг умумий савияси бўлди. Айниқса, ҳужум чизиғи вакилларининг яккалик маҳоратни оқилона ҳаракатлар билан уйғунлаштира олиши қойилмақом. Улар нафақат тўп ўзларида бўлганида, балки тўғри позиция танлаш ва бўш ҳудудларга очилиш орқали ҳам катта хавф туғдира оладилар. Мураббий сифатида бундай деталлар мен учун жуда қизиқарли, чунки улар футболчиларнинг шахсий маҳоратини умумий тактик тизимга қандай сингдириш мумкинлигини кўрсатиб беради.
— Сизнингча, "Ал Насср" Элит Осиё Чемпионлар Лигасида ғолиб чиқиш учун етарли имкониятга эгами?
— "Ал Насср" Осиё футболининг энг юқори савиясида рақобатлашиш учун зарур бўлган яккалик маҳорат, тажриба ва салоҳиятга ҳақиқатан ҳам эга. Бироқ ушбу мусобақада ғолиб чиқиш шунчаки ажойиб футболчиларга эга бўлишдан кўра кўпроқ нарсани талаб қилади. Барқарорлик, тактик мувозанат, жамоани бошқариш, руҳий чидамлилик ва ҳал қилувчи баҳсларда босим остида ўйнай олиш — буларнинг бари ҳал қилувчи омиллар. Бундай савиядаги турнирда ҳар бир майда деталь натижани белгилаб бериши мумкин. "Ал Насср" бош соврин учун курашишга қодир, бироқ уларнинг якуний муваффақияти мусобақа давомида ушбу омилларнинг барчасидан қанчалик самарали фойдалана олишига боғлиқ.
— Саудия Арабистони Про лигаси савияси ҳақида нима дея оласиз? Келажакда у ерда мураббийлик қилиш ниятингиз борми?
— Саудия Арабистони лигаси — жозибадорлиги тобора ортиб бораётган улкан мақсадли футбол муҳити. Унинг ривожланиши бутун минтақага бўлган халқаро қизиқишнинг ошишига хизмат қилди. Шунингдек, бу мусобақа юқори савиядаги футболчилар ва катта мақсадларга эга клублар билан ишлаш имконини тақдим этади. Мураббий сифатида мен доимо ўзимга чақирувлар ташлашга, касбий жиҳатдан ўсишга ва имкон қадар юқори савияда рақобатлашишга интиламан. Албатта, Саудия Арабистонида ишлаш келажакда қизиқарли имконият бўлиши мумкин, бироқ айни пайтда мен бор эътиборимни "Нефтчи"даги масъулиятимга қаратганман. Мураббий ўз ишига диққатини жамлаши, натижаларга эришиши ва ўз ғояларини ривожлантиришда давом этиши керак деб ҳисоблайман.
— Футболдан ташқари, Саудия Арабистонига қилган сўнгги ташрифингизни қандай тасвирлайсиз?
— Саудия Арабистони қалбимда алоҳида ўрин тутади. Менда бу мамлакат ҳақида жуда илиқ таассуротлар ва ёрқин хотиралар бор. Ўтган йили мен Ўзбекистон U-17 терма жамоасини Тоиф шаҳрида бўлиб ўтган 17 ёшгача бўлганлар ўртасидаги Осиё Кубоги финалида айнан Саудия Арабистонига қарши майдонга олиб чиққандим. Терма жамоамиздан икки нафар футболчи четлатилганига қарамай, 9 киши бўлиб қолган ҳолда финалда 2:0 ҳисобида ғалаба қозонишга муваффақ бўлгандик. Ўша учрашув менинг мураббийлик фаолиятимдаги энг унутилмас лаҳзалардан бири бўлиб қолмоқда.
Шу сабабли Саудия Арабистонига ҳар бир ташриф мен учун нафақат касбий, балки ҳис-туйғулар нуқтаи назаридан ҳам ўзгача аҳамият касб этади. Саудия Арабистони халқининг меҳмондўстлиги, илиқ муносабати ва футболга бўлган иштиёқи менда доимо жуда ижобий таассурот қолдирган. Мен Саудия Арабистонини нафақат у ерда қўлга киритган улкан муваффақиятимиз, балки қалбимга яқин бўлиб қоладиган хотиралари учун ҳам эслайман. Бу юртга яна қайтиш ва унинг ажойиб муҳитини қайта ҳис қилиш мен учун катта мамнуниятдир.
