– Ғалаба ва урган голингиз билан табриклаймиз. "Бунёдкор" стадионида собиқ жамоангизга қарши ўйинда гол урганингизда қандай ҳиссиётларни кечирдингиз?
– Биринчи галда, барчаси учун Худога шукрона айтаман. Бу биз учун жуда муҳим ўйин эди, чунки чемпионат бошидан бери натижаларимиз кўнгилдагидек бўлмаганини ҳамма билади. Шундай экан, бугун кучли жамоага, ўзимнинг собиқ жамоамга қарши муҳим баҳс бўлиб ўтди. Албатта, ғалабадан хурсандман. Лекин биз шу руҳда давом этишимиз керак. Кейинги ўйинларда янада кучлироқ ҳаракат қилишимиз зарур. Уч кундан кейин ўз мухлисларимиз қаршисида Самарқанднинг жуда яхши шаклланган жамоасига қарши ўйнаймиз. Шунинг учун жипслашиб, навбатдаги учрашувда ҳам ғалаба қозонишга ҳаракат қилишимиз керак. "Бунёдкор" ҳақида гапирадиган бўлсам, ҳа, бу ўзига хос ҳиссиётлар эди. Мен у ерда ўзимни уйдагидек ҳис қиламан. Уларга кейинги ўйинларда омад тилайман.
– Сизни жамоага Самвел Бабаян таклиф қилганди. Бош мураббийнинг ўзгариши ўйинингизга ва майдондаги эркинлигингизга таъсир қиляптими?
– Йўқ, ундай эмас. Мен бундай демаган бўлардим. Бу – футбол. Футболда нима бўлишини олдиндан билиб бўлмайди, ҳар қандай ҳолат юз бериши мумкин. Бошида ўзгача эди, ҳозир эса бошқа мураббий ва бошқача футбол. Шундай экан, бор кучимни беришга ҳаракат қиляпман. Мураббий ким бўлишидан қатъи назар, ўзимни максимал даражада кўрсатишга ва жамоага имкон қадар кўпроқ ёрдам беришга интиламан.
– Ўтган мавсумнинг якунини жуда сермаҳсул ўтказган эдингиз, лекин "Андижон"даги ҳозирги статистикангиз у қадар мақтанарли эмас. Бунинг асосий сабаби нимада?
– Ҳа, шундай, биласизми, гап фақат статистикада эмас. Ҳозир "Андижон"да янги ўйинчилар жуда кўп. Шунинг учун бир-биримизни, майдонда қандай ҳаракат қилишимизни яхшироқ тушуниб олишимиз, ўзаро мослашишимиз керак. Гап ўйин услубида. Назаримда, энг муҳими – жамоага фойда келтиришга уриниш. Албатта, ҳужумкор футболчилар учун гол уриш, голли узатмалар бериш муҳим аҳамиятга эга. Буни барча хоҳлайди, лекин буни амалга ошириш осон эмас. Шундай экан, қаттиқ меҳнат қилишда ҳамда голлар ва ассистлар орқали жамоага имкон қадар кўпроқ ёрдам беришга ҳаракат қиламан.
