Еркакча гапирганда, афсуски, биз учун жаҳон чемпионати якунланди. Албатта, биз кутган натижа бўлмади, лекин умуман олганда таассуротлар қандай, дастлабки учта ўйин қандай ўтди?
– Натижага қарамай, албатта, бу ерда бўлганимиздан хурсандман. Натижа, албатта, кайфиятни бироз бузди, лекин бошқа томондан, олдинга ҳаракат қилишда давом этамиз. Менимча, мураббийлар штаби ҳам, йигитлар ҳам бундай даража қандай бўлишини кўришди. Хатолар устида ишлаб, олдинга интиламиз. Мен олдин ҳам айтгандим, ҳозир ҳам йигитларга такрорладим – бошни туширмаслик керак. Ҳа, оғриқли, ҳа, ёқимсиз, бунга қўшиламан, ҳамма учун шундай: бизга ҳам, яқинларимизга ҳам, бутун мамлакатга ҳам, тўғри. Лекин олдинга ҳаракат қилиш керак, ишлаймиз, қўлни туширмаймиз ва менимча, икки-уч баравар кўпроқ меҳнат қиламиз.
Ўйиндан кейин кийиниш хонасида Фабио Каннаваро билан гаплашдингиз, у жуда эҳтиросли гапираётганди, балки сизга бирор гап айтгандир ёки дашном бергандир?
– Келинг, бу жамоанинг ичида қолсин. Ҳа, унинг ҳам ўз ташвишлари, ҳаяжонлари бор эди. У шундай нарсаларни гапирдики, менимча, улар кийиниш хонасида қолиши керак.
Фаолиятингиздаги биринчи жаҳон чемпионатидан қандай фикрлар бор эди?
– Бу борада, келинг очиғини айтайлик, биз гўдак эмасмиз-ку, рақиблар жиддий, энг кучли жамоалар эканини тушуниб тургандик – Португалия ҳам, Колумбия ҳам шундай. Конгони ҳам негадир ҳамма ҳисобдан чиқариб қўйганди, лекин биз уларнинг видеоларини кўргандик, жуда тартибли жамоа. Умидлар катта эди, ҳеч бўлмаганда гуруҳдан чиқишни мақсад Кўргандик. Аммо қандай бўлган бўлса, шундай бўлди.
Мен Россияданман. Бизнинг футболчилар ютқазиб қўйишса, улар ижтимоий тармоқларда ўзларини нималар кутаётганини яхши билишади. Илгари умуман футбол кўрмаган, лекин жаҳон ёки Европа чемпионати бошлангани учун томоша қилишни бошлаган одамлар дарҳол уларни ер билан битта қилишни бошлашади. Сизларда ҳам шундай бўлишидан хавотир борми?
– Барибир норози бўладиган одамлар топилади, футболни тушунмай туриб, шунчаки томоша қиладиган ва фақат ғалаба қозонишимизни истайдиганлар бор. Мен уларни тушунаман. Терма жамоада шундай давр бўлганди, бизни роса "янчишганди", тўғри, шундай пайт бўлган. Лекин биз ўсяпмиз, мана, жаҳон чемпионатига чиқдик ва бу салбий кайфият камайиб бормоқда. Барибир бизни қўллаб-қувватлайдиган одамлар бор ва уларнинг аксарияти, ҳатто ютқазганимизда ҳам суяб туришади.
Умуман олганда, жаҳон чемпионатига чиққанимизнинг ўзи катта ютуқ. Тарихда биринчи марта ва бу халқимиз учун, ҳатто футболга қизиқмайдиган, ҳар сафар футбол кўрмайдиган, футболнинг ички "сир-асрорларидан" хабари йўқ одамлар учун ҳам ижобий маънода жуда катта туртки бўлди деб айта оламан.
Ҳозир ҳам танқидлар бўлади, бунга ишончим комил, лекин аввалгидек кўп эмас. Чунки айтганимдек, биз ўсяпмиз ва ҳозирги кунда терма жамоага бўлган ишонч ва ижобий ёндашув даражаси анча юқори.
Байрам шукуҳини ҳис қила олдингизми? Барибир бу ерда энг кучли жамоалар, ўша Роналдуга қарши майдонга тушиш, тўла стадионлар, одамлар оқими, катта шов-шув. Бу ерда мухлислар ҳам... Биринчи бўлимда стадион худди Тошкентда бўлгандек туюлди.
– Умуман олганда, бу ерга келганимиздан бери, биринчи ўйинда Колумбияга қарши ўйнаганимизда, стадионнинг 90 фоизи, майли, 80 фоизи Колумбия мухлислари бўлган бўлса ҳам, 80 минг одам ҳайқирганда пайдо бўладиган муҳит, аура – бу ўзгача. Албатта, йигитлар ҳам бу лаҳзани ҳис қилишди деб ўйлайман. Иккинчи ўйинда Криштиануга қарши ўйнадик... Кайфиятни фақат натижа бироз бузди, йигитларга ҳам айтдим, барибир 5 та гол ўтказиб юбориш кўп, жуда кўп. Тўғри, у ерда ҳам ўзига яраша нозик жиҳатлар бор.
Бошқа тарафдан, кимки фақат ёмонликни кўришни истаса, доим ёмонлик топади. Ким яхшиликни кўришни истаса, доим яхшилик топади. Ҳа, ютқазди, лекин ёмон тажриба ҳам — тажриба. Бундан хулоса чиқариш мумкин ва чиқариш керак, кейин эса олдинга интилиш лозим.
Мана шундай катта турнирлар таъмини сезиб кўргандан кейин, бундан буёғига нималарни хоҳлайсиз? Осиёда барқарор равишда кучли учликка кириш кераклиги тушунарли, лекин жаҳон чемпионатларига чиқиш борасида қандай орзулар бор?
– Менинг шахсий мақсадим – орқага қадам ташламаслик. Қандай ривожланаётган бўлсак, қандай кетаётган бўлсак, майли секин бўлсин, майли кичик қадамлар билан бўлсин, лекин худди шундай олдинга қараб давом этишимиз керак. Ҳа, бу жаҳон чемпионатида нималарга қодирлигимизни тўлиқ кўрсата олмадик, хатолар бўлди, майли, буни четга суриб турайлик. Энди кейинги сафар ҳам жаҳон чемпионатига чиқишга ҳаракат қилиш керак.
Бу ерга шунчаки бир марта тасодифан келиб қолмаганимизни, балки ҳар сафар барқарор равишда чиқа олишимизни исботлашимиз лозим. Кейин эса гуруҳдан ҳам барқарор чиқишга интилиш керак. Албатта, булар бироз юқори мақсадли фикрлар, лекин ҳаракат қилиш керак. Айтганимдек, қадамма-қадам ҳаракат қилсак, ички чемпионатимиз ҳам ўсади ва олдинга интиламиз. Мен айнан мана шуни хоҳлайман. Мен мана шуни кутяпман: шунчаки "бўлди, чиқдик, келдик, раҳмат каттакон, энди яна 30 йил кутамиз" эмас, йўқ, мен буни хоҳламайман.
Осиёга келсак, у ерда албатта бошқача вазифалар бўлади ва менимча, у ерда чемпионлик учун курашиш бизнинг қўлимиздан келади.
