Хулиан Альварес “Барселона” ва ПСЖда ўйнашни истайди. Diario Sport нашрининг ESPN журналисти Мартин Аревалога таяниб хабар беришича, шартномани узайтириш борасидаги музокаралар чоғида ҳужумчи ўз агенти орқали “Атлетико” раҳбариятига ҳозирги жамоасида ўзини қулай ҳис қилаётганини, бироқ ўзини қизиқтирган лойиҳаларга қўшилиш имконияти пайдо бўлса, режаларини қайта кўриб чиқиши мумкинлигини айтган. Гап “Барселона” ва ПСЖ ҳақида кетмоқда.
Таъкидланишича, мадридликлар бош мураббийи Диего Симеоне одатда ўз ўйинчиларининг кетишига тўсқинлик қилмайди, шу боис Альваресга ҳам халақит бермаслиги эҳтимоли юқори.
“Атлетико” ҳужумчи учун 150 млн евро сўрайди, шунинг учун келишувга эришиш жуда қийин кечади. Бироқ “Барселона” айнан футболчининг истаги музокараларда ҳал қилувчи омилга айланиши мумкин, деб ҳисобламоқда. Аргентиналик футболчи Роберт Левандовскининг асосий ўринбосари сифатида кўрилмоқда.
