Sherzod Temirov: "Iroq ligasini mendan ham ko'ra sizlar ko'proq bilasizlar-ku"

"Terma jamoamizning navbatdagi yig'inini boshlash arafasidamiz. Katta tanaffusdan keyin MTJga qaytdim. O'zimni yaxshi tomondan ko'rsatishga harakat qilaman", – dedi 27 yoshli hujumchi.

- Iroq chempionatida to'purar bo'lib turibsiz...

- Iroqda ikkinchi davra boshlangan. Oldinda yana 12-13 tur bor. Raqobat ham ancha kuchli. To'purarlik masalasidagi raqobatchilarim ham bor.

- Opta portaliga ko'ra, Iroq chempionati Superligamizdan kuchli ekan. Ushbu fikrga qanchalik qo'shilasiz?

- Iroq ligasini mendan ham ko'ra sizlar ko'proq bilasizlar-ku.

- Qaysi biri kuchliroq deb o'ylaysiz?

- Sizlar, yani jurnalistlar bu masalaga oydinlik kiritganingiz yaxshi, men emas.

- O'tgan mavsumlar davomida Gonkong chempionatida ham yaxshi o'yin namoyish etgan edingiz, ammo terma jamoadan chaqiruv bo'lmagandi. Kannavaro sizni terma jamoaga jalb etgani siz uchun qanchalik kutilmagan qaror bo'ldi?

- Bizning insonlarning fikricha, Gonkong chempionatining darajasi past, lekin Gonkongda juda ko'p legionerlar bor. U erda ham raqobat bor. Terma jamoaga chaqiruv — har bir murabbiyning qarori. Unga etiroz bildira olmayman. Terma jamoada o'zimni ko'rsatishga maksimal harakat qilaman.

- Yozda Superliga klublaridan taklif bo'lsa, O'zbekistonga qaytishingiz mumkini?

- Hozir ham takliflar bor. Agentim bilan ko'rishib olib, barcha takliflarni ko'rib chiqamiz.