Hakim Fuzaylov: “Vazifamiz Superligaga yo'llanma olish”

- Muhim o'yinda alamli mag'lubiyatga uchradik. O'yinda nazoratni o'z tomonimizga og'dirdik. Lekin futbolda shunaqa holatlar kuzatilib turiladi. 2 ta penaltidan foydalana olmadik. Bu mag'lubiyatdan tushkunlikka tushmasligimiz va pley-offga tayyorgarlik ko'rishimiz lozim.

-  Jamoada aslida kim shtatli penaltichi?

-  Jamoada shtatli penaltichi bor edi. Lekin ular maydonda emasdi. Aytaylik, Ro'zim Ahmedov zaxiraga olingandi. Bunday holatda kim o'ziga ishonsa, o'sha tepishi mumkin. Afsuski, omadimiz kelmadi. 

- Jamoangiz nimaning evaziga mag'lubiyatga uchradi?

- O'ylashimcha, omad kelmadi. Aytaylik, taktik tomondan xato qilganimiz yo'q. Raqib ikkinchi qavatda yaxshi o'yin ko'rsatishini bilardik. Dastlabki golni mana shunday holatda o'tkazib yubordik. Kurashlarda raqibda aslo ortda qolmadik. 2 ta penaltini ura olmadik. Umuman olganda, omadimiz kelmadi. 

- “Turon”ning mag'lubiyatga uchrashi sizni tinchlantiryaptimi?

- Aslo yo'q. CHunki biz o'z o'yinimizni o'ylashimiz kerak. To'g'ri, “Turon” ham yutqazdi. Lekin pley-off bahslarida hammasi hal bo'ladi. O'tgan mavsum “Neftchi” yaqqol ustunlik qilgan bo'lsa, hozirda “Andijon” etakchi. Tushkunlikka tushmasligimiz va oldinda turgan pley-off orqali masalani hal qilishga harakat qilamiz. 

- Oldinda turgan pley-offga jamoangizni qay tariqa tayyorlamoqchisiz?

-  Tushunarliki, endi oson o'yin yo'q. Turnir jadvalida pastda turgan jamoalarga qarshi emas, aksincha, “Andijon”, “Turon”, “Mashal”, “Xorazm” kabi jamoalar bilan to'qnash kelamiz. Tabiiyki, bunday bellashuvlar oson kechmaydi. Tayyorlagarlikni kuchaytirishimiz lozim.

-  Rahbariyat tomonidan qo'yilgan vazifa o'zgarmadimi?

- Yo'q. Jamoani Superligaga olib chiqishimiz kerak. Hali hech narsa yo'qotganimiz yo'q. 

-  Ro'zim Ahmedovni nega ertaroq almashtirdingiz?

-  Ikkinchi bo'limda charchab qoldi, uni ustiga sariq kartochka olgan edi. Agar yana qo'pollik ishlatsa, maydonda kamchilik bo'lib qolishimiz mumkin edi. SHuni inobatga olib, uni almashtirdim.