- O'yin haqida fikringiz?

- Bugun futbol o'ynaydigan jamoaga qarshi bahs olib bordik. O'yin muxlislarga yoqdi degan fikrdaman. Og'ir uchrashuvni o'tkazdik. Oxirgi daqiqalarda belgilangan penalti sabab tayyor g'alabani boy berdik. Tushunarsiz holat bo'ldi. Hakamni VARga chaqirishdi. Bizdagi vaziyatda esa hech kim chaqirmadi. Bu nima bilan bog'liq bilmayman. Xullas men VARni tushunmayapman. Nafaqat bizda, hamma joyda shunaqa bo'lsa kerak. Bizga ko'p bor kartochka ko'rsatishdi. Raqib o'yinchisiga ikkinchi "sariq" ko'rsatilishi kerak paytda hakamlar jim turishdi. Balki men hakamlikni yaxshi tushunmasman. Shuning uchun jim turganim maqul.

- O'yindan qoniqdingizmi?

- Jamoamiz oxirigacha harakat qildi. "So'g'diyona" o'tgan turni bizdan oldin o'ynagani bois ularda tiklanish uchun bir kun ko'p vaqt bo'ldi. Shunga qaramay biz ham yaxshi o'yin namoyish etdik. Oxirigacha kurashdik. Og'ir maydon va hakamlikka qarshi qiyin bahsni o'tkazdik.

- Edem Nemanov ketma-ket ikkinchi uchrashuvda asosiy tarkibda maydonga tushdi. U bundan keyin jamoaning asosiy darvozaboni bo'ladimi?

- Ko'ramiz. Bizda darvozabonlar bilan ishlaydigan murabbiy bor va har o'yindan oldin uning fikrini eshitamiz. Edem endi terma jamoaga ketadi.

- 25 avgust kuni "Sho'rtan" bilan o'yinda rotaciya ko'ramizmi?

- Qanaqa rotaciya? "Sho'rtan" oddiy jamoa emas. Biz hali o'yinni yutganimiz yo'q. "Sho'rtan" "Bunyodkor"ga yutqazmadi, bugun esa "Navbahor"dan ochko oldi. Bunga jiddiy qaraymiz. Raqibni mensimaslik qanday oqibatlarga olib kelishini juda yaxshi bilamiz. Tezroq tiklanib navbatdagi bahsga hozirlik ko'ramiz.

- Bugungi uchrashuvni ko'rish uchun terma jamoamiz bosh murabbiyi Timur Kapadze ham keldi. Sizningcha, qaysi futbolchilar uning diqqatini tortgan bo'lishi mumkin?

- Doriev bo'lsa kerak.

- Yo'q, o'zbek futbolchilardan?

- Uni bilmadim. O'zimizning futbolchilar haqida Timurning o'zidan so'rash kerak.

Vadim Abramov: "Men VARni tushunmayapman"