Kompaniyaning futbol bo'yicha yangi rahbari Rojer Shmidt bo'ladi - mutaxassis rasman 1 oktyabrdan o'z vazifasiga kirishadi.
Shmidt yaqinda Germaniya terma jamoasini boshqarish uchun o'z lavozimini tark etgan Kloppning o'rnini egallaydi. 59 yoshli Shmidt “Red Bull” falsafasi bilan juda yaxshi tanish - u 2012 yildan 2014 yilgacha “Zalcburg”ni boshqargan va kompaniya uslubiga eng yaqin murabbiylardan biri hisoblanadi.
Yangi lavozimida Shmidt “Red Bull” tizimiga kiruvchi barcha klublar - “Leyptsig”, “Nyu-York”, “Zalcburg”, Braziliyaning ”Bragantino”, Yaponiyaning “Omiya Ardiya”, shuningdek, kompaniya minoritar ulushga ega bo'lgan “Lids” va “Parij” klublarining sport tomondan rivojlanishi uchun mas'ul bo'ladi.
Shmidtning oxirgi ish joyi “Benfika” bo'lgandi. 2022/23 yilgi mavsumda germaniyalik murabbiy Lissabon klubi bilan Portugaliya chempionligini qo'lga kiritdi va jamoani Chempionlar Ligasining 1/4 finaliga olib chiqdi. 2025 yilning oktyabr oyidan esa u Yaponiya J-ligasida futbol masalalari bo'yicha konsultant sifatida faoliyat yuritayotgan edi. Shmidt shiddatli hujumkor uslub va yuqori pressingga asoslangan futboli bilan mashhur - aynan shu tamoyillar “Red Bull” futbol modelining negizini tashkil qiladi.
“Red Bull“ tuzilmasida Shmidt loyihaning sport qismiga mas'ul bo'ladi. Mamuriy yo'nalishni esa avvalgidek Florian Sholc boshqarib boradi.
