- Ўйин ҳақида фикрингиз?
- Аввало чиройли ғалаба билан барча мухлисларимизни табриклайман. Ушбу ғалабани узоқ йўл босиб келган ишқибозларга бағишлайман. Қолаверса футболчиларимизга ҳам алоҳида раҳмат, бугун охиригача курашиб чиройли ғалабани қўлга киритдик. Учрашув тезкор гол билан бошланди, шунга қарамай вазиятдан чиқиб кета олдик. Баҳс давомида ўйинни тўлиқ назорат қилдик деб ўйлайман.
- Аввало ўтган туғилган кунингиз билан табриклайман. Саволим аввалги турдаги ўйин бўйича. Ўтган тур "Бухоро" билан кечган баҳсдаги ҳакамликни қандай баҳолайсиз?
- Тўғриси, бу саволга жавоб бермоқчи эмасман. Негаки бу борада ўз фикримни айтиб бўлдим ва бошқа тўхталишни хоҳламайман. Ҳакамлар қўмитаси ҳам ўйинни кўриб чиқиб ўз муносабатини билдирди. Биз эса ишлашда давом этишимиз керак.
- Бугунги ўйиндаги ротациялар ўзини оқлади. Шу ҳақда тўхталиб ўтсангиз.
- Эътибор бераётган бўлсангиз, ҳар ўйинда ротацияга қўл уряпмиз, чунки таркибдаги ҳар бир футболчига имконият беришни истаймиз. Шу орқали ўйин сифатини ҳам ошириб боришга ҳаракат қилганмиз. Камчиликларимиз жуда кўп, ҳали ўзимизнинг идеал ўйинимизни кўрсата олганимиз йўқ. Мавсум узоқ, ишлашда давом этамиз. Бўшашишга умуман ҳаққимиз йўқ.
- Фаррух Сайфиевнинг жароҳати ҳақида.
- У сон қисмидан жароҳат олган. Шунингдек, Аброр Исмоиловнинг қовурғаси синган. Бу икки футболчи биз учун катта йўқотиш, умид қиламизки, тез орада соғайиб яна сафга қайтишади.
