O'zbekiston "Paxtakor" stadionida Rossiyani qabul qildi.
Mezbonlar o'yinni faol boshlab, o'z so'zlarini aytishdi. 5-daqiqadayoq burchak zarbasidan so'ng Viktor Melyoxin to'pni o'z darvozasiga kiritib yubordi - 1:0!
Birinchi bo'lim keskin kurashlar ostida o'tdi. Rossiya hisobni tenglashtirish yo'llarini izladi, O'zbekiston esa ustunlikni mustahkamlashga harakat qildi. Biroq jamoalar tanaffusga 1:0 hisobida yo'l olishdi.
Tanaffusdan so'ng O'zbekiston darhol ikkinchi golni urdi. 47-daqiqada Behruz Karimov farqni oshirdi - 2:0!
G'alaba yaqindek tuyulgandi, ammo Rossiya o'yinni butunlay o'zgartirib yubordi. 69 va 76-daqiqalarda Nikolay Komlichenko gollar urib, dublni rasmiylashtirgan bo'lsa, 79-daqiqada Aleksey Miranchuk mehmonlarning uchinchi to'pini kiritdi.
Final hushtagi! 2:3 - Rossiya terma jamoasi g'alabani ilib ketdi!
Ikki to'p farqi bilan oldinda borishdan mag'lubiyatgacha. "Paxtakor"da haqiqiy futbol dramasi yuz berdi...
Shahzoda Tojieva
