Кеча "Барселона"нинг собиқ футболчиси ва мураббийи Нидерландияда таништирилди. У 2030 йилнинг ёзигача мўлжалланган шартномага қўл қўйди.
Матбуот анжуманида Хавидан олдин KNVB техник директори Найджел де Йонг сўзга чиқди. У иттифоқда бир нечта номзодлар бўлганини тушунтирди, улардан биринчиси — Пеп Гвардиола, иккинчиси — Арне Слот.
"Кейин биз дарҳол ҳозир ёнимда ўтирган Хавига эътибор қаратдик. Биз амбициялар, мазмун, ўйин услуби ва тактик хусусиятларга асосланган муҳокамаларни ўтказдик. Суҳбатлар сўнгги тўрт ҳафта давомида бўлиб ўтди.
Биз Хави билан унинг Барселонадаги уйида бир неча бор гаплашдик, у шунингдек бу ерда, Нидерландияда ҳам бўлди. Бизда унинг футбол ҳақидаги қарашлари ва ўйин услуби бўйича ёқимли суҳбатлар бўлиб ўтди.
Хави ўзини Нидерландия футболининг фарзанди деб атайди. У бизнинг футбол маданиятимизни баҳам кўрадиган инсондир. Бизда ҳужумда ҳам, ҳимояда ҳам ўйиннинг аниқ асосий тамойиллари бор. Хави жозибали футбол, юқори прессинг, устунлик қилувчи футбол ўйини ва тўпга эгалик қилишга доимий интилишни ўзида мужассам этган. Хави бизникига яқин бўлган тамойилларга амал қилади. Шунинг учун бу тўғри танлов деб ўйлайман", – деди де Йонг.
Кейинроқ журналистлардан бири Хавига савол берди: "Гвардиола ва Слотдан кейин ушбу лавозимга учинчи номзод эканингизни билиш сизга қандай туюлмоқда?"
"Мен учун бу жуда катта шараф — бу Нидерландия. Болалигимда Нидерландия терма жамоаси ўйинларини томоша қилганимда, бу ажойиб футбол эди. Мен ҳам шундай ўйнашни хоҳлайман. Бу менинг мақсадим. Учинчи ёки ўнинчи номзод бўлишимнинг мен учун фарқи йўқ.
Гвардиола ва Слотдан кейин бўлиш ёмон позиция эмас, тўғрими? Камида шоҳсупада", – деди мураббий ва бу билан журналистларнинг кулишига сабаб бўлди.
