Сўнгги поғона эгасига қарши Анталия шаҳри жамоаси
Мусобақа жадвалининг энг қуйи қисмида жойлашган "Қосимпошо" 4 очко билан 11-ўринни банд этиб турган "Антальяспор"ни меҳмон қилади.
Омадли дебютант ва омадсиз жамоа учрашуви
Яна бир ҳали бирон марта ғалаба қозонмаган клуб "Қайсариспор" ўз майдонида узоқ йиллик танаффусдан сўнг элитага қайтган ва ажойиб старт олишга эришган "Денизлиспор"ни қабул қилади.
Азалий рақиблар тўқнашуви
Ўзининг шонли тарихига эга "Фенербахче" ҳозирча 3-ўринда. Бу турда улар доимий рақобатчилари "Анқарагюжю" билан баҳс олиб боришади. Ҳар иккала жамоа ўртасидаги очколар фарқи минимал даражада. Мезбонлар 7 очко жамғарган бўлишса, анқараликлар улардан бор йўғи 2 очко кам тўплаган ҳолда 12-поғонада.
Жиддий қарама-қаршилик
Ўтказилган тўртта ўйинда икки ғалаба ва шунча дуранг қайд этган, ҳали мағлубият аламини тотиб кўрмаган "Ризеспор" ўз уйида 6-ўриндаги "Газиантеп"ни меҳмон қилади. Жамоалар ўртасидаги кичик тафовут бир очкони ташкил қилади.
Қуйидаги жамоа мусобақа карвонбошиси уйида меҳмон
Сўнгги ўриндан бир поғона юқорида турган "Генчлербирлиги" турнир жадвалида якка пешқадамликни ўз қўлига олган "Аланьяспор" майдонига сафар қилади.
Кучлилар ўртасидаги жанг
Турнинг марказий ўйинида мусобақа жадвалида бир-бирига жуда яқин жойлашган клублар тўқнаш келади. Унда, Суперлига кубогининг амалдаги соҳиби "Галатасарой" меҳмонда совринли ўринлар учун курашаётган яқин таьқибчиси "Йени Малатьяспор" билан баҳс олиб боради.
Тобора сўнаётган грандлар учрашуви
Ўз номига ярашмаган ўринларни эгаллаб турган чемпионатнинг доимий етакчи жамоалари ўртасидаги баҳс кўпчиликни қизиқишига сабаб бўла олади. Истанбул шаҳрининг шу ном билан аталувчи клуби "Истанбул Башакшеҳир" мусобақанинг кўп карра ғолиби "Бешиктош" майдонида меҳмон бўлади. Улар тегишлича 4 очкодан жамғариб, ёнма-ён 13-14-поғоналарни банд этишган.
Бир-бирига ўхшаш клублар беллашуви
Турга якун ясаб берувчи ўйинда ҳозирда кучли ўнталикда бораётган икки жамоа 3 очко учун ўзаро кураш олиб боришади. "Сивасспор" ўз майдонида "Трабзонспор"ни қабул қилади.
Хондамир Ҳакимов
