Япониялик бош ҳакам Тошимицу Ёшида пенальтини амалга ошириш вақтидаги қоида бузилишини (ҳужум қилаётган томон футболчисининг жарима майдончасига барвақт кириб кетиши) нотўғри талқин қилиб, қоидага кўра "қайта тепиш" белгилаш ўрнига, Баҳрайн фойдасига билвосита эркин зарба берган эди.
Ўзбекистон терма жамоасининг 1:0 ҳисобидаги ғалабаси билан якунланган мазкур ўйин кейинчалик ФИФА томонидан бекор қилиниб, қайта ўтказилиши белгиланган. Натижада, Ўзбекистон терма жамоаси кейинги ўйинларда дуранг ўйнаб, жаҳон чемпионати йўлланмасидан қуруқ қолган бўлса, Тошимицу Ёшида ФИФА томонидан номаълум муддатга четлатилган.
Қуйида япониялик ҳакамнинг ўша вазиятга билдирган фикрини ҳавола этамиз:
Ўша учрашувда мен Ўзбекистон фойдасига пенальти белгиладим. Ўзбекистонлик футболчи зарба беришга тайёрланаётган эди, бироқ у тўпни тепишидан олдин унинг жамоадоши жарима майдончасига кириб кетди. Футболчи зарба берди ва тўп дарвозадан жой олди. Қоидаларга кўра, агар ҳужумкор жамоа ўйинчиси жарима майдончасига вақтидан олдин кириб кетса ва гол урилса, "пенальтини қайтадан тепиш" – қоиданинг тўғри қўлланилиши ҳисобланади.
Мен ўзбекистонлик футболчининг ҳудудга кириб кетганини кўрган эдим. Видеотакрорларни кўрсангиз, менинг ўзим ҳам "Қайтадан тепилади", деганимни эшитиш мумкин. Бироқ ўша лаҳзада тўпнинг дарвозага киргани ҳақидаги факт мутлақо хаёлимдан кўтарилди.
Баҳрайнлик футболчилар югуриб келишди ва "Дарвозабон тўпни қайтарди. Қолаверса, ўзбекистонлик футболчи ҳудудга биринчи бўлиб кирган эди, демак, бу билвосита эркин зарба бўлиши керак!", деб қаттиқ эътироз билдиришди. Шу сонияда тўп дарвозага киргани ҳақидаги ҳақиқат қаергадир ғойиб бўлди ва мен "Ҳа, ростдан ҳам, дарвозабон тўпни қайтаргани учун ўйинни ҳимояланувчи жамоа билвосита эркин зарба билан бошлаши керак экан", деб ўйлаб, хато қилдим. Шундай қилиб, мен ҳимояланувчи жамоага билвосита эркин зарба белгиладим.
Бу мутлақо йўл қўйиб бўлмайдиган, жуда қўпол хато эди. Ўйин эса шу зайлда давом этди. Танаффус пайтида қоидаларни қўллашда қанчалик мудҳиш хатога йўл қўйганимни англаб етдим ва қолган ҳакамларга "Бу ўйиндан сўнг халқаро тоифадаги ҳакамлик фаолиятимни якунлайман", деб айтдим.
Ўйин эса одатдагидек давом этиб, Ўзбекистоннинг 1:0 ҳисобидаги ғалабаси билан якунланди. Мағлуб бўлган баҳрайнлик футболчилар ҳам келиб қўл беришди ва ўйин тинчгина якун топди. Бироқ кейинчалик Ўзбекистон футбол ассоциацияси норозилик билдириб, ФИФАга шикоят қилди. Японияга қайтиб келганимдан сўнг, "Ҳакамнинг қарори якуний ҳисобланади", деган қоида бекор қилинганини ва ўйинни қайтадан ўтказиш белгиланганини билдим. Ўйлашимча, бу бутун дунё тарихида биринчи марта юз берган ҳолат эди.
Бундан ташқари, мен ФИФА томонидан номаълум муддатга четлатилдим. Натижада халқаро тоифадаги ҳакамлик гувоҳномамни ўз ихтиёрим билан топширишга мажбур бўлдим. Бутун дунё бўйлаб интернетда "Тошимицу Ёшида" номи тарқалиб кетди ва энди Японияда ҳам ҳакамлик қила олмасам керак, деб ўйлагандим.
Лекин ўша пайтдаги J-Лига раиси Сузуки жаноблари: "У J-Лиганинг энг юқори даражадаги ҳакамларидан бири, унга J-Лигада ишлашга рухсат берамиз", дедилар.
Ишдаги хатони фақат иш билан тўғрилаш мумкин, деб ҳисоблайман. Менинг ишим – майдонда ҳуштак чалиш. Шу сабабли хатони фақат майдондаги ишим орқалигина ювишим мумкин эди. Бу хато туфайли газеталарда қаттиқ танқид қилиндим, исмим бутун дунёга тарқалди.
Бошқалар ҳам мен йўл қўйган хатони такрорламасликлари учун мамлакат бўйлаб ўтказиладиган маърузаларда бутун ҳақиқатни айтиб бераман. Бу ҳолатни фақат бошидан ўтказган инсонгина тушуниши мумкин, менинг вазифам эса – ҳақиқатни етказиш.
