Конго ДР терма жамоаси АҚШга кириб, бир ойдан камроқ вақт ичида бошланадиган Жаҳон чемпионатида иштирок этиши учун Эбола вируси юқишининг олдини олиш мақсадида 21 кун давомида "пуфак" режимида изоляцияда бўлиши керак. Бу ҳақда жума куни Оқ уй маълум қилди. Конго ДР эса бу талабга бўйсуниш ниятида эмас.
Марказий Африканинг бир қанча мамлакатларида авж олган Эбола эпидемиясига қарамай, Конго Демократик Республикаси терма жамоасига ўз ҳудудидаги Жаҳон чемпионатида иштирок этиш учун "яшил чироқ" ёққанидан бир ҳафта ўтиб, АҚШ бунинг шартларига ойдинлик киритди. Оқ уйнинг маълум қилишича, Конго терма жамоаси АҚШга киришни истаса, касаллик юқишининг олдини олиш учун 21 кун давомида "пуфак" режимида изоляцияда бўлиши шарт.
"Биз Конгога барчасини очиқ ва тушунарли қилиб айтдик: улар 11 июнь куни Хьюстонга келишдан олдин 21 кун давомида ўзларининг изоляциядаги пуфаклари яхлитлигини сақлашлари шарт", – деди Оқ уйнинг Жаҳон чемпионатига масъул гуруҳи раҳбари Эндрю Жулиани "ESPN" телеканалига берган интервьюсида. Ушбу муддатга амал қилиш учун, айни пайтда Бельгияда тайёргарлик йиғинини ўтказаётган терма жамоа шу жума кунидан бошлаб изоляцияга ўтиши керак эди.
"Агар бошқа одамлар терма жамоага қўшилиш учун келса, улар жамоаникидан алоҳида яккаланиш тартибида бўлиши керак, – дея қўшимча қилди у. – Агар улар келгач, бирортасида касаллик белгилари пайдо бўлса, бутун жамоа Жаҳон чемпионатида иштирок эта олмаслик хавфи остида қолади". Жулиани "AFP" агентлигига берган баёнотида Оқ уй "жамоани турнирда иштирок этиш имкониятини кафолатлаш мақсадида, ўз ўйинчиларини ортиқча хавфдан ҳимоя қилишга ва пуфак яхлитлигини сақлашга ундаётганини" тасдиқлади.
Конго ДР матбуот котиби эса жамоа ўз дастурини ўзгартирмаслигини, хусусан, 3 июнь куни Льежда Данияга қарши, орадан олти кун ўтиб эса Кадисда Чилига қарши тайёргарлик ўйинлари режадагидек ўтишини маълум қилди. Асосий базаси Техас штатининг Хьюстон шаҳрида жойлашадиган Конго Демократик Республикаси "K" гуруҳидан жой олган. Улар 17 июнь куни Хьюстонда Португалияга, 23 июнь куни Гвадалахарада (Мексика) Колумбияга ва ниҳоят 27 июнь куни Атлантада Ўзбекистонга қарши майдонга тушади.
