Марокаш Жаҳон чемпионати доирасида Бразилияга қарши 1:1 ҳисобида дуранг ўйнади.
Асосий таркибдаги 11 нафар футболчининг барчаси хорижда ўйнаши билан биргаликда, Марокаш иккинчи бўлимдаги ўзгаришдан сўнг бутунлай мамлакат ташқарисида туғилган 11 нафар ўйинчи билан ҳаракат қилди.
11 нафар футболчининг тўққиз нафари Испания, Франция ёки Бельгияда туғилган бўлса, "Манчестер Юнайтед"нинг ўнг қанот ҳимоячиси Мазрауи Нидерландиянинг Лейдердорп шаҳрида дунёга келган.
Дарвозабон Боно эса Канаданинг Монреаль шаҳрида туғилган.
Бразилияга қарши ўзининг илк расмий ўйинини ўтказган бош мураббий Муҳаммад Уаҳби эса Бельгиянинг Брюссел шаҳрида таваллуд топган.
Франциянинг Тулуза шаҳрида туғилган марказий ҳимоячи Исса Диоп Франциянинг U21 гача бўлган барча ёш тоифасидаги терма жамоаларида ўйнаган ва шу йил бошида Жаҳон чемпионати олдидан халқаро миқёсда Марокаш шарафини ҳимоя қилишга қарор қилган эди.
Бу тарихий натижа 65-дақиқада "Страсбур" вингери Самир Эл-Мурабет Марокашда туғилган Аззедин Унаҳининг ўрнига майдонга тушганидан сўнг қайд этилди.
Страсбурда туғилган Эл-Мурабет Франция клубининг ёшлар академиясидан етишиб чиққан ва 20 ёшида ўз мамлакатининг энг умидли футболчиларидан бири сифатида баҳоланмоқда.
Нью-Йоркдаги баҳснинг сўнгги дақиқаларида Марокашда туғилган ҳужумчи Суфён Раҳими захирадан майдонга тушгунига қадар, ушбу ноёб статистика 24 дақиқа давом этди.
