Аргентина ҳукумати АҚШ расмийларидан шу ёзда бўлиб ўтадиган 2026 йилги Жаҳон чемпионати ўйинларига 13 000 нафар мухлиснинг ташриф буюришини тақиқлашни сўради.
Аргентина турнирга амалдаги чемпион сифатида йўл олмоқда ва келаси ойда Жаҳон кубогини боши узра кўтариш учун асосий фаворитлардан бири ҳисобланади.
Лионель Скалони шогирдлари "J" гуруҳида пешқадамлик қилмоқда ва ўзининг илк ўйинини чоршанба куни тонг саҳарда Канзас-Ситида Жазоирга қарши ўтказади. Шунингдек, плей-офф босқичига чиқиш мақсадида улар Австрия ва Иордания билан ҳам куч синашади.
Шу ёзда бутун дунёнинг нигоҳи Аргентинага қаратилади, бироқ мамлакат ҳукумати бир қатор мухлисларнинг ушбу ўйинларга боришига йўл қўймасликни қатъий мақсад қилган.
Испаниянинг "AS" нашри хабар беришича, Аргентина расмийлари Қўшма Штатларга алимент тўловларидан бўйин товлаган 13 000 га яқин ота-оналардан иборат рўйхатни тақдим этган.
Уларнинг фикрича, ўз фарзандларини молиявий жиҳатдан таъминлай олмаган ота-оналарга 2026 йилги Жаҳон чемпионатига боришга рухсат берилмаслиги керак. Буэнос-Айрес мэри Хорхе Макри шундай деди: "Агар улар ўз фарзандларини таъминламаса, уларга стадионга киришга рухсат берилмайди".
Аргентинанинг бундай кескин позицияси "Хавфсиз трибуналар" деб номланган миллий ҳукумат ташаббуси билан боғлиқ. Дастур фарзандларининг асосий эҳтиёжларини эътиборсиз қолдириб, спорт тадбирларига бориш учун пул топадиган ота-оналарни аниқлаш ва жазолашга қаратилган. Маълум бўлишича, АҚШ расмийларига топширилган рўйхатга алиментдан қарздор бўлган ва аввалроқ Аргентина судлари томонидан қарздор деб топилган шахслар киритилган.
Сўнгги ойларда қарздорларни, яъни белгиланган муддатда мажбурий даврий тўловларни амалга оширмаган шахсларни топишга эътибор кучайтирилди. Аргентина ҳукумати ушбу рўйхатни АҚШ ҳуқуқни муҳофаза қилиш органлари билан баҳам кўриш орқали Жаҳон чемпионати ўйинларига ташриф буюришга уринаётган қарздор шахсларни аниқлашга умид қилмоқда.
2023 йилда "Хавфсиз трибуналар" ташаббуси кенгайтирилганидан бери, Аргентина жамияти томонидан кенг қўллаб-қувватланмоқда. Расмий статистикага кўра, 1328 та футбол ўйини давомида тўрт миллиондан ортиқ томошабин текширилган. Бу давр мобайнида ҳибсга олиш учун ордерлари бўлган 1166 нафар шахс аниқланган ва ўнлаб маъмурий тақиқлар жорий этилган.
АҚШ расмийларини қарздорлар ҳақида хабардор қилишдан ташқари, ушбу кенгайтирилган рўйхатга аввал зўравонлик билан боғлиқ жиноятларни содир этган шахслар ҳам киритилган.
"Рўйхат стадионларга кириши тақиқланадиган 15 мингдан ортиқ одамни ўз ичига олади", – деди Миллий хавфсизлик вазири Патрисия Буллрич. "Бу биз учун жуда муҳим, чунки Аргентина стадионларида бирон бир жиноят содир этган ҳеч бир зўравон шахс ушбу спорт тадбирида иштирок эта олмайди".
