Бугун Сенегал драматик кечган учрашувда Бельгияга 2:3 ҳисобида мағлуб бўлди, ваҳоланки улар ўйин давомида 2:0 ҳисобида олдинда боришмоқда эди. Гейе жамоаси 86 ва 89-дақиқаларда гол ўтказиб юбориб, ғалабани қўлдан чиқарди.
"Мен яна мусобақадан чиқиб кетганимиз бўйича сизларга бир неча оғиз сўз айтиш учун қайтаман… лекин бугун шуни эълон қиламанки, модомики терма жамоа тепасида ушбу мураббийлар штаби турар экан, мен бошқа терма жамоада ўйнамайман", — деб ёзди Гейе ўз сторисида.
Бош мураббий Пап Тьяв қўл остида Сенегал жамоаси 2026 йилги Африка Кубогида ғолиб чиққан эди. Ўшанда Марокашга қарши кечган жанжалли финалда (1:0) бироздан кейин бойкот сабабли ғалаба Марокашга берилган эди.
Эслатиб ўтамиз, ўша ўйиннинг энг сўнгги дақиқаларида ҳакам Сенегалнинг голини бекор қилган, бир неча дақиқадан сўнг эса уларнинг дарвозасига шубҳали пенальти белгилаган эди. Тьяв ҳиссиётларга берилиб, жамоани майдондан олиб чиқиб кетган, аммо қарийб 20 дақиқадан сўнг Садио Мане шерикларини қайтишга кўндирган эди. Марокашликлар пенальтидан унумли фойдалана олишмаган, Сенегал эса қўшимча бўлимларда ғалабани илиб кетганди — ўшанда ғалаба тўпини айнан Гейе киритган эди. Бироқ якунда КАФ Апелляция қўмитаси қарори билан Сенегал олтин медаллардан маҳрум этилганди.
