- Ўйин ҳақида фикрингиз?
- Аввало жамоамизни ғалаба билан табриклайман. Жамоа қийин даврни бошдан ўтказди ва ўйлайманки, бугунги ғалаба ёқимли бўлди. Бугунги ўйин шуни кўрсатдики, жамоада салоҳият юқори. Биз бўшашмаймиз ва кейинги баҳсларга ҳозирлик кўришни бошлаймиз. Бу биз учун жуда муҳим ғалаба бўлди.
- Биринчи таймдан кейин ҳисоб 0:0 эди. Иккинчи таймда рақиб футболчиси қизил карточка олди. Агар "Каттақўрғон" ҳам охиригача тўлиқ таркиб билан ҳаракат қилганида баҳс қийин кечиши мумкинмиди?
- Мен бу борада сал бошқача фикрдаман. Баъзан 10 киши қолган жамоага қарши 11 кишилик жамоа эркин ҳаракат қилишга ўтади ва натижада ўйинни бой бериб қўяди. Жамоа 10 киши қолиб ҳам қарши ҳужумда гол уриб кетиши мумкин. Йигитларимизга баракалла, биз бўшашмадик ва охиригача ҳаракат қилдик. Ўз навбатида рақиб ҳам яхши ўйин кўрсатди деган бўлардим. Жамоа сафидаги ёшлар яхши таассурот қолдирди.
- Бунгача "Бунёдкор"да эдингиз ва ҳозир "Каттақўрғон"да ишлаяпсиз. Суперлига клубидан Пролига жамоасига келиш ғалати эмасми? Ёки бошқа таклиф бўлмадими?
- Мен бу ҳақда олдин ҳам айтганман. Мен футболдаги одамман ва мен учун олий лигами, биринчи лигами унчалик фарқи йўқ. Муҳими, ўз Ватанимдаман ва севган касбим билан шуғулланяпман. Доим мураббий бўлиб ишлашни хоҳлаганман. "Каттақўғон"га келганимдан хурсандман, клубнинг ғоялари ёқяпти. Футболни ривожлантириш учун раҳбариятда иштиёқ кучли. Бу ерда 5та ўйин ишлайманми, 10тами ёки бир ярим йилми, қанча муддат ишласам ҳам жамоа ривожи учун ўз ҳиссамни қўшаман. Агар бироз кутганимда Суперлигадан ҳам таклифлар бўларди, лекин "Каттақўрғон" раҳбарияти билан суҳбатимиз мени шу ерга чорлади.
- Раҳбарият томонидан сизга вазифа қўйилдими?
- Яширмаймиз, "Каттақўрғон" совринли ўринларни кўзлаб Пролигани бошлаганди. Лекин унутмаслик керакки, хоҳиш қатори тизимли ишлаш ҳам керак бўлади. Вазиятга реал қарайлик, "Арал" биринчи ўринда кетяпти, иккинчи ўриндаги "Шўртан" ҳам Суперлига ҳавосини яхши билади. "Металлург" ҳам кучли клублардан. "Каттақўрғон" эса янги жамоа, биз плей-офф орқали Суперлигага чиқишга ҳаракат қиламиз. Бунинг учун бор кучни ишга соламиз.
