Якшанба куни "кольчонерос" Ла Лиганинг 7-тури доирасидаги ўз майдонидаги дербида ғалаба қозонди (2:1). Ўйиннинг бош ҳаками Мигель Анхель Ортис Ариас бўлди.
Ўйиндан сўнг "Реал" бош мураббийи Жозе Моуринью матбуот анжуманига "қаймоқранглилар" футболчиларига нисбатан ишлатилган қўполликлар тасвирланган суратларни чоп эттириб олиб келди. Шунингдек, португалиялик мутахассис ҳакамлик борасида бир қатор кескин фикрларни билдирди: "Ҳакам 41 ёшда, унда дерби учун тажриба етишмади. У фақат кичик ўйинларда ишлаган кучсиз ҳакам. Ҳакамлар қўмитасини табриклайман", "Биз шунчаки кулкили нарсаларни кўрдик — "Осасуна"га урилган голнинг бекор қилиниши, "Барса"нинг пенальтиси. Лига менсиз ўзгаргандир деб ўйлагандим, аммо йўқ". Ҳакамлик бўйича танқидлар "Реал" клуб ТВ эфирида ҳам янгради.
Кеча "Атлетико" Моуриньюнинг "Реал" билан дербидаги қўполликлар акс этган суратларни ушлаб турган фотосини чоп этди ва: "Ҳакамларга нисбатан босим ўтказишни ҳозироқ тўхтатинг", деб ёзди. Кейинроқ клуб яна бир пост жойлади: "Бу мавсумда улар жуда эрта бошлашди. Механизм ишга туширилди".
Бугун "Реал" клуб ТВ эфирида "Атлетико" футболчилари ва Диего Симеоненинг ҳакамлар қарорларидан норозиликлари ҳамда клубнинг твитларидан олинган скриншотлар акс этган узун видеоролик намойиш этилди. Видеода, бошқа нарсалар қаторида, "матрасчилар" бош мураббийининг Ла Лига "Реал"нинг чемпионлиги учун "хавфли тарзда тайёрлаб қўйилгани" ҳақидаги иқтибоси ва Арда Тураннинг қанот ҳакамига бутсасини улоқтирган вазияти кўрсатилган.
"Қачонки [ҳакамлар қарори] уларнинг зарарига бўлса, улар бунчалик ҳурмат кўрсатишмайди. Уларнинг хотираси калта — ҳакамларга ҳурмат кўрсатишни талаб қилишади, лекин фақат баъзида. Ҳозир улар ҳурмат талаб қилишмоқда, аммо ўзларига ёқмайдиган нарсани кўришса, шикоят қилишади.
Бу ерда ҳурмат унчалик кўп эмас — кўпроқ ҳакамлар шаънига ҳақоратлар бор. Четдан кузатаётган ҳар қандай одам ўн йиллардан бери бир хил нарса такрорланаётганини пайқаши мумкин — тизим шундай ва биз бунга ўрганиб бўлганмиз.
Сиз ҳурмат талаб қиласиз, аммо сизни нимадир қониқтирмаса, Твиттерда ёзасиз. Бирор нарса нотўғри кетганда ҳурмат йўқолади. Агар [қарор] сизингда фойдангизга бўлса, уни ҳурмат қиласиз, агар зарарингизга бўлса — унчалик эмас", — дейилади роликда.
