Афсонавий итальян футболчисининг сўзларига кўра, унинг Серия Ада карьерасини давом эттириш учун вариантлари бўлган — "Женоа" ва "Комо" клублари фахрий футболчига жиддий қизиқиш билдирган.
— Ўша пайтда "Женоа"ни Альберто Жилардино бошқараётган эди, "Комо"да эса рул Сеск Фабрегаснинг қўлига ўтганди, — деб эслайди Тотти. — Ёшим 48 да эди, бироқ футболда айрим ёш чегараларини енгиб ўтиш мумкин. Ҳа, тезлик аввалгидек эмас, аммо маҳорат ва зарба ёш ўтиши билан йўқолмайди.
Шу вақт мобайнида мен ҳар душанба куни мунтазам равишда мини-футбол ўйнаб юрдим. Бундан ташқари, графигимга ҳафтасига уч марта зал машғулотларини ва фиизиотерапевт билан икки машғулотни қўшдим. Қатъий парҳезга ўтишга тўғри келди: нон ҳам, ширинликлар ҳам — умуман ҳеч нарса мумкин эмасди. Ширинликдан воз кечиш ҳаммасидан ҳам қийин кечди. Ярим асрлик юбилейга яқинлашиб қолган инсонлар учун табиий бўлган мушаклардаги оғриқларни ҳисобга олмаганда, организм юкламаларга жуда яхши бардош берди.
Ақлим бу чақириқни қабул қилишим кераклигини айтди, аммо юрагим бунга рад жавобини берди. Ҳамма гапнинг таги менинг "Рома"га бўлган туйғуларимда эди. Спортдаги хиёнатнинг эскирган муддати ҳам, ёш чегараси ҳам йўқ — бунда 18 ёшдамисан ёки 48, фарқи йўқ.
Эслатиб ўтамиз, Франческо Тотти аллақачон шу кунларда — 27 сентябрда ўзнинг 50 ёшли юбилейини нишонлайди. "Император" "Рома" шарафини чорак аср — 1992 йилдан 2017 йилгача ҳимоя қилган. У "жаллоросси" сафида 785 та учрашув ўтказиб, 307 та гол муаллифига айланган. Ўйинчилик фаолиятини якунлагач, италиялик мутахассис римликлар тизимида қолиб, бош мураббий ёрдамчиси ва клуб спорт директорининг ассистенти сифатида фаолият юритган.
