Хусусан, Польшанинг "Лех" клуби сафида 7 та гол уриб, фаолиятидаги энг яхши мавсумлардан бирини ўтказаётган ва айни пайтда Эроннинг энг юқори спорт формасидаги легионери бўлиб турган 25 ёшли Аллоҳёр Сайёдманешнинг таркибга киритилмаслиги кўпчиликни ҳайратда қолдирди. Асосан ёши катта футболчилардан ташкил топган терма жамоага бундай юқори кўрсаткичга эга ўйинчининг чақирилмаслиги спорт жамоатчилигида турли саволларни уйғотди.
Ушбу ҳолатга бош мураббий Амир Ғаленойининг ёрдамчиси Саид Элаҳуийнинг қисқача изоҳи оловга мой сепгандек бўлди. Элаҳуий футболчининг техник ёки жисмоний имкониятлари ҳақида эмас – балки унинг "хулқ-атворидаги камчиликлари" сабабли терма жамоага жалб этилмаганини таъкидлади.
Мураббийнинг мазкур баёнотидан сўнг Аллоҳёр Сайёдманеш машҳур журналист Одил Фирдавсипурга берган интервьюсида кескин муносабат билдирди. У ўзида ҳеч қандай ахлоқий ёки интизомий муаммо йўқлигини таъкидлаб, Ғаленойи унга умуман ишонмаслигини айтиб ўтди. Ҳаттоки, футболчи бош мураббий унинг қайси клубда ва қайси позицияда ўйнашини билишига ҳам шубҳа қилишини очиқчасига билдирди. Шунингдек, Сайёдманеш токи Амир Ғаленойи терма жамоа бошқарувида экан, Эрон шарафини ҳимоя қилмаслигини қатъий маълум қилди.
Мазкур можародан сўнг Эрон футбол федерациясига яқин бўлган бир қатор нашрлар мураббий қарорини ёқлаб чиқишди. "Fars" ва "Tasnim" агентликларининг хабарларига кўра, Сайёдманешнинг миллий жамоадан четлатилишига унинг сиёсий норозиликларга бағишланган татуировкаси сабаб бўлган. Бу маълумот федерация ёки мураббийлар штаби томонидан расман тасдиқланмаган бўлса-да, воқеалар ривожи футболчининг спорт формаси эмас, балки айнан майдондан ташқаридаги омиллар туфайли терма жамоадан четлатилганини кўрсатмоқда.
Эслатиб ўтамиз, Эрон терма жамоаси ФИФА кунлари доирасида Фарғонада Ўзбекистонга қарши ўртоқлик учрашуви ўтказади.
