"Жаҳон чемпионатининг очилиш ўйинига тайинланганимизда, бутун дунё бизга ишончсизлик билан қараган эди. Чунки жаҳон чемпионатининг очилиш ўйинини бошқариш жуда катта босим остида кечади. Бу – мусобақанинг ҳакамлик стандартларини белгилаб берадиган ўйин бўлиб, биз ўша жаҳон чемпионатидаги энг ёш ҳакамлар жамоаси эдик. "Нега энг ёш ҳакамларни тайинлаяпсизлар? Булар ҳали бирорта жаҳон чемпионатида қатнашмаган бўлса, Ўзбекистоннинг ўзи умуман жаҳон чемпионатларида ўйнамаган бўлса... Ўзбекистонда ўзи футбол борми?" – деган қандайдир камситишлар ҳам бўлган.
Ўша пайтда Ўзбекистон фарзандлари ҳақиқатан ҳам ҳар қандай савияда ўз юртини муносиб намоён эта олишга қодир эканлигини, ўзбекистонликларнинг қўлидан нималар келишини кўрсатиб қўйиш биз учун жуда катта мотивация бўлган. Шундай бўлди ҳам. Бизни хурсанд қилган нарса шу бўлдики, бошида бизга ишончсизлик ва ҳаттоки камситиш билан қараган инсонларнинг фикри ўзгарди. Жаҳон чемпионатининг охирига яқинлашганда: "Финал ўйинига ўзбекистонликларни тайинлаш керак, улар энг муносиб ҳакамлар", – дея фикрларини ўзгартириб, муносабат билдиришди", деди 48 ёшли мутахассис.
Эслатиб ўтамиз,Равшан Эрматов Жаҳон чемпионатлари тарихида энг кўп ўйин бошқарган ҳакам ҳисобланади. У учта мундиалда жами 11 учрашувда бош ҳакам сифатида ишлаган.
