41 ёшли хорват хавбеги ўзининг келжакдаги режалари ҳақида Хорватия ва Испания терма жамоалари ўртасидаги Миллатлар лигаси учрашуви тугаганоноқ фикр билдирди. Ҳозирча “Олтин тўп” соҳиби А Сериядаги ўйин фаолиятига тўлиқ эътибор қаратган ва узоқни кўзлаган ҳолда фаолиятини якунлаш муддатини ҳали қатъий белгиламаган.
— “Реал”га қайтиш орзу бўлар эди, — дея Модричнинг сўзларидан иқтибос келтиради Marca. — Бироқ бундай қадамни қўйишдан олдин пухта тайёргарлик кўришим, қандай лавозимни эгаллай олишимни аниқ тушуниб олишим ва Мадрид раҳбарияти бу ҳамкорликдан манфаатдор эканига амин бўлишим керак. “Реал” — менинг уйим ва ҳаётимдаги клуб. Шу билан бирга, “қироллик клуби” тузилмасида ишлаш бўйича ҳозирча аниқ ва тасдиқланган режаларим йўқ.
Эслатиб ўтамиз, буюк хорват ярим ҳимоячиси мадридликлар сафида 13 йил — 2012 йилдан 2025 йилгача тўп сурган. Ушбу феноменаль даврда Модрич “қаймоқранглилар” сафида 590 та ўйин ўтказиб, жамоа билан биргаликда 28 та совринни, жумладан, Ла Лиганинг тўртта титули ва УЕФА Чемпионлар лигасининг олтита кубогини қўлга киритган. 2018 йилда эса хавбек нуфузли “Олтин тўп” мукофотига сазовор бўлган эди.
