24 сентябрь куни Ўзбекистон ва Эрон терма жамоалари ўртасида ўртоқлик ўйини ўтказилади. Шу муносабат билан айни дамда Тошкентнинг "Пахтакор" клубини ҳимоя қилаётган форслар термасининг собиқ футболчиси Муртазо Пуралиганжи ҳаёт йўли ҳақида ҳикоя қиламиз.
Муртазо Пуралиганжи 1992 йил 19 апрелда Эроннинг Мозандаронига қарашли Бабол шаҳри яқинидаги Пойин Ганж Афруз қишлоғида дунёга келди. Унинг болалиги оғир йўқотиш ва чуқур қайғу билан бошланди — Муртазо эндигина икки ёшга тўлганида оила устуни бўлган отасидан айрилди. Бу фожиа оиланинг бутун молиявий ва маънавий масъулиятини унинг муштипар онаси ва акасининг зиммасига юклади.
Спортга бўлган илк қизиқишлар нафақат футбол, балки волейбол билан ҳам боғлиқ эди. Болалигида у бўйи баланд ва чаққон бўлгани учун волейболни севиб ўйнар, ҳатто икки спорт тури ўртасида иккиланиб ҳам қолганди. Бироқ футбол қудрати уни яшил майдон сари етаклади. Агар спортчи бўлмаганида, у ўзининг тиришқоқлиги ортидан мутлақо бошқа соҳада ишлаши мумкинлигини ҳам яширмайди.
"Отам вафот этганида мен эндигина икки ёшда эдим ва ўша мудҳиш кундан то бугунги кунгача онам мен учун таърифлаб бўлмас машаққатларни чекди. Болалигимдан буюк мақсадларим бор эди ва уларни дафтаримга ёзиб юрардим; доим миллий терма жамоанинг муқаддас либосини кийишни орзу қилардим. Ўша болалигимдан, мен учун ҳамма нарсасидан, ўз ҳаловатидан воз кечган онам учун катта ишлар қилишни хоҳлардим, токи у бошини баланд кўтариб, бутун дунёга 'менинг ўғлим муваффақиятли инсон бўлди' дея олсин. Ҳаётимда нимагаки эришган бўлсам, барчаси онамнинг дуолари ва акам мен учун қилган фидокорона меҳнатларидандир. Агар футболчи бўлмаганимда, ўқишим яхши бўлгани учун, албатта банк ходими бўлардим!"
2010 йил "Нафт Теҳрон" клубининг асосий таркибига қўшилган Пуралиганжи, дастлаб таянч ярим ҳимоячиси сифатида шаклланди. У 2011 йилда "Пайкон"га қарши ўйинда (4:1) илк профессионал голини урди ва ўзини майдон марказида ишончли ҳаракат қилувчи, тўпни тақсимлайдиган ва рақиб ҳужумларини бузадиган ярим ҳимоячи сифатида кўрсата бошлади. "Нафт" клуби бош мураббийи, собиқ футболчи Али Ризо Мансуриён қўл остида у таянч зонасининг энг муҳим ва барқарор фигураларидан бирига айланди.
Бироқ Эрон терма жамоасининг ўша вақтдаги бош мураббийи, дунёга машҳур португалиялик мутахассис Карлуш Кейруш ёш иқтидор эгасида мутлақо бошқа, янада каттароқ салоҳиятни кўра олди. Кейруш Пуралиганжининг ярим ҳимоячиларга хос бўлган кенг майдонни кўриш қобилияти, совуққонлиги ва тўп билан муомала қилиш маданиятини айнан ҳимоя марказида ишлатишни мақсад қилди.
2014 йилнинг охирида Португалияда ўтган ўқув-машғулот йиғинида Кейруш уни илк бор марказий ҳимоячи позициясига қўйиб синаб кўрди. Бу қарор 22 ёшли футболчи учун ҳам катта таваккалчилик, ҳам фаолиятини бутунлай ўзгартириб юборувчи улкан имконият эди. Янги позицияга мослашиш катта тактик интизом ва позицион хато қилмасликни талаб этарди.
"Мансуриён 'Нафт'да мени таянч зонасида ўйнатарди. Мен терма жамоада бор-йўғи 20 дақиқага яқин таянч ярим ҳимоячиси сифатида ҳаракат қилдим, лекин бир куни Кейруш ёнимга келиб, менга ярим ҳимоядан кўра ҳимояда кўпроқ ва кучлироқ ўсишимни айтди. У мени шу позицияда кўраётганини таъкидлади. Кейруш Португалиядаги йиғинда мени ҳимоя чизиғига ўтказган кундан бошлаб, бор эътиборим ва хаёлимни шу позицияга қаратдим. Худо менинг йўлимга шундай инсонни учратгани учун ва 22 ёшли, халқаро майдонда тажрибаси йўқ ўйинчига шунчалик ишониб, асосий таркибни топширгани учун яратганга юз минг марта шукур қиламан. Бу воқеа менинг бутун тақдиримни ўзгартириб юборди!"
Муртазонинг халқаро майдондаги ҳақиқий кашфиёти ва катта саҳнага чиқиши 2015 йил Австралияда бўлиб ўтган Осиё Кубогига тўғри келади. Турнир арафасида терма жамоадаги бошқа тажрибали марказий ҳимоячиларнинг жароҳат олгани туфайли, Кейруш ёш Пуралиганжини Баҳрайнга қарши дастлабки ўйиндаёқ асосий таркибга киритишга мажбур бўлди. У ўзининг фавқулодда хотиржамлиги, кучли ҳаводаги курашлари ва позицион саводхонлиги билан барча мутахассисларни ҳайратда қолдирди. Бироқ турнирнинг ва балки унинг бутун фаолиятининг апогейи чорак финалдаги Ироққа қарши учрашув бўлди.
2015 йил 23 январь. Канберра стадиони. Футбол тарихига Осиё Кубогининг энг драматик, асабий ва томошабинпсанд ўйинларидан бири сифатида кирган бу баҳс Муртазо учун ҳам қаҳрамонлик, ҳам анти-қаҳрамонлик лаҳзаларини тақдим этди. Учрашувнинг 43-дақиқасида Меҳрдод Пўладийнинг баҳсли ва бахтсиз қизил карточкасидан сўнг 10 киши бўлиб қолган Эрон, қўшимча бўлимларда 2:1 ҳисобида ортда бораётган эди. Умидлар сўнаётган бир пайтда, 103-дақиқада бурчакдан узатилган тўпга энг баланд сакраган Пуралиганжи ўта кучли ва аниқ бош зарбаси билан ҳисобни тенглаштирди. У шу сониянинг ўзидаёқ бутун миллатнинг нажоткори ва қаҳрамонига айланди.
Лекин футбол ўта шафқатсиз ўйиндир. Орадан бор-йўғи 13 дақиқа ўтиб, 116-дақиқада айнан Муртазо Пуралиганжи ўз жарима майдончаси ичида ироқлик Ёсир Қосимга нисбатан қоида бузди ва ҳакам Бенжамин Уильямс иккиланмасдан пенальти белгилади. Ироқ пенальтидан яна олдинга чиқиб олди (гарчи Эрон 119-дақиқада Ризо Ғучаннажоднинг голи билан яна ҳисобни тенглаштириб, 3:3 қилган бўлса-да, пенальтилар сериясида 6:7 ҳисобида аламли мағлубиятга учради).
"Фаолиятим давомида урган энг яхши ва энг қадрли голим Ироққа урган голим эди ва бу голни ҳеч қачон унутмайман. Яна қандай гол урсам ҳам, ҳаётимдаги энг муҳим гол Ироқ миллий терма жамоасига урилган гол бўлиб қолади. Футбол шундай аёвсиз — бир сонияда бутун миллатнинг қаҳрамони бўлсанг, кейинги сонияда битта хато билан ҳаммасини барбод қилишинг мумкин. Аммо айнан шу машаққатлар, кўз ёшлар ва хатолар бизни тоблайди, бизни кучлироқ инсонга айлантиради!"
2015 йилги Осиё Кубогидаги ёрқин ва муросасиз ўйинидан сўнг, Муртазога Осиё ва Европанинг қатор клубларидан таклифлар тушди. Эронлик мухлислар ўзларининг янги ҳимоя чизиғи юлдузини нуфузли Европа чемпионатларида кўришни исташарди. Бироқ, 2015 йилнинг февраль ойида у кутилмаганда Хитой Суперлигаси вакили "Тяньцзинь Тэда" клуби билан бир йиллик шартнома имзолади. Бу қарор Эронда катта резонанс ва кескин норозилик келтириб чиқарди.
Спорт иқтисодиёти ва логикаси нуқтаи назаридан Хитой лигаси ўша пайтда астрономик маблағлар сарфлаётган, юлдузларни сотиб олаётган, аммо Европа даражасидаги соф футбол рақобатидан йироқ лига эди. Ижтимоий тармоқларда эронлик мухлислар футболчини фақат катта маош учун бу танловни қилганликда айблаб, уни ва оиласини аёвсиз ҳақорат қилишди.
Бу вазият футболчининг руҳиятига қаттиқ таъсир қилди. У хорижда ёлғиз яшаш азобини тортди, аммо унинг қарори ортида чуқур прагматик сабаблар бор эди. Хитойда унга тажрибали голландиялик мутахассис Ари Хан устозлик қилди. Энг муҳими, шартномасида қачондир Европадан таклиф тушса, клуб уни тўсиқсиз қўйиб юбориши кераклиги ҳақида банд бор эди. Хитой унинг учун молиявий мустақиллик ва Европага ўтиш учун ўзига хос кўприк вазифасини ўташи керак эди.
"Эсимда, Хитойга кетганимда кўпчилик Инстаграм ва изоҳларда менга ва оиламга, яқинларимга чексиз ҳақоратлар ёғдиришган эди! Қасам ичаманки, ҳатто бу ҳақоратларни ўқишга уялардим ва юрагим эзиларди. Мени дунёга келтирган оиламнинг нима гуноҳи бор эдики, уларга шундай муносабатда бўлишлари керак эди? Мен осон ишни танламагандим. Ўша Хитой ўз лигаси учун миллиардлаб сармоя киритмоқда эди. Агар сен майдонда ўйнасанг, ҳамма сени яхши кўради. Агар захирада ўтирсанг ва ўйнамасанг, ҳеч ким ҳатто сенга қарамайди ҳам ва ҳеч қандай Европа жамоасига бора олмайсан. Шунинг учун мен хис-туйғуларга эмас, ақлга таяниб, ҳамма нарсани ўрганиб чиқиб, кейин қарор қабул қилганман".
Хитойдан сўнг Пуралиганжи яна бир бор Европани эмас, Қатарни танлашга қарор қилди. 2016 йилнинг январида у Қатарнинг энг номдор ва бой клуби — "Ал-Садд" сафига қўшилди. Бу ерда уни нафақат юқори маош ва яхши шароитлар, балки футбол тарихидаги энг буюк ярим ҳимоячилардан бири, испаниялик Хави Эрнандес кутиб турарди.
Ёшлигида Мадриднинг "Реал" клубига ашаддий мухлислик қилган ва болалик дафтарларига дунёнинг энг зўрлари билан бирга ўйнашни орзу қилиб ёзган йигит учун "Барселона" афсонаси ва тики-таканинг юраги бўлган инсон билан бир кийиниш хонасида бўлиш сюрреалистик ҳолат эди. Муртазо Хавининг нафақат майдондаги даҳолигидан, балки майдон ташқарисидаги ўта камтарлиги ва одамийлигидан ҳайратда қолди. Хави унга ўз акасидек, маслаҳатгўй мураббийидек муносабатда бўлди.
"Ас-Садд" ва "Ал-Араби" ўртасидаги марказий Қатар дербисида Хавининг аниқ узатмасидан сўнг Муртазо бош билан чиройли гол урди. Голдан сўнг у тўғри Хавининг ёнига югуриб бориб, уни маҳкам қучоқлади — бу шунчаки гол нишонлаш эмас, балки болалик орзусининг рўёбга чиқиши эди. Муртазонинг "Реал"га мухлислик қилиши эса жамоа ичида Хави билан қизиқарли ҳазилларга сабаб бўларди. Шунингдек, Осиё Чемпионлар Лигаси доирасида БААнинг "Ал-Жазира" клубига қарши кечган драматик пенальтилар сериясида (2:2 дан сўнг) ҳам Хави, ҳам Муртазо ўз зарбаларини нотўғри амалга оширишганида, айнан испаниялик юлдуз ва жамоа мураббийи Жезуалду Феррейра уни руҳан қўллаб-қувватлади.
"Хави билан биринчи марта кўришганимда, қаршимда турган одам шу қадар оддий ва самимий эдики, у худди менинг акамдек туюлди. Бир лаҳза 'Пойтахт' сериалидаги Нақи Одатийнинг машҳур гапи эсимга тушиб, ичимда: 'Наҳотки шунақаси ҳам бўлиши мумкин, бўлиши мумкинми?!' – дедим. Шунчалик буюк инсон шу қадар камтар! Мен 'Реал Мадрид' мухлисиман ва Хави билан доим ҳазиллашиб тортишардик; унга 'Барселона'нинг услуби бошқа жамоаларнинг мотивациясини ўлдиришини айтардим. Бир куни кийиниш хонасида у менга инглиз тилида: 'Офарин Муртазо, сен машғулотлардагидек расмий ўйинларда ҳам гол ура олишингни кўрсатдинг,' деганида, мен ундан қанчалик кўп нарса ўрганаётганимни ҳис қилдим. У майдон ичидаги тирик мураббий ва мен унинг ҳар бир ҳаракатидан, қандай яшашидан тортиб қандай тўп узатишигача ўрганишга интиламан".
Карлуш Кейруш бошчилигидаги Эрон терма жамоаси 2018 йилги Россияда ўтадиган Жаҳон чемпионатига саралаш босқичида бирорта ҳам гол ўтказиб юбормай (сўнгги турга қадар) мутлақ рекорд билан йўлланмани қўлга киритди. Бу феноменал натижанинг марказида, мудофаа қўрғони сифатида айнан Пуралиганжи турарди. Қуръа Эронни ҳақиқий "ўлим гуруҳи"га — дунёнинг етакчилари бўлмиш Испания, Португалия ва Марокаш билан бир гуруҳга ташлади.
Бу турнир Муртазо учун нафақат жисмоний, балки фаолиятидаги энг юқори даражадаги психологик ва руҳий синов бўлди. Испанияга қарши ўйинда (0:1) унга дунёнинг энг агрессив, провокатор ҳужумчиларидан бири Диего Костани қўриқлаш вазифаси юклатилган эди. Футболнинг "қора санъати" устаси бўлган Коста эронлик ҳимоячини мувозанатдан чиқариш ва қизил карточка олишига эришиш мақсадида майдонда энг тубан психологик усуллардан фойдаланди. Коста ўйин бошидан охиригача Муртазонинг кўзига қараб, унинг онаси ва синглисини хунук сўзлар билан ҳақорат қилди. Лекин Пуралиганжи ўзини йўқотмади. У онасига бўлган чексиз ҳурматини ва ватани олдидаги масъулиятини биринчи ўринга қўйиб, провокацияга учмади.
Учинчи турда Португалияга қарши драматик ўйинда (1:1) Муртазо яна бир бор бутун дунё диққат марказига тушди. Тўп учун курашда дунёнинг энг яхши футболчиларидан бири Криштиану Роналду тирсаги билан Пуралиганжининг юзига атайлаб зарба берди. Пуралиганжи майдонга қулади. Ҳакам VAR орқали вазиятни кўриб чиқди, аммо Роналдуга қизил эмас, фақат сариқ карточка кўрсатди. Карлуш Кейруш бу адолатсиз қарордан ғазабга минди ва футбол қоидалари Месси ёки Роналду учун бошқача ишламаслиги кераклигини, тирсак билан зарба бериш сўзсиз қизил карточка эканлигини таъкидлади.
"Менимча, Диего Коста мутлақо ахлоқсизлик қилди ва мен унга фақат ачинаман. У ўйин бошидан охиригача кўзимга қараб, онам, синглим ва оиламнинг бошқа аъзолари ҳақида жуда хунук сўзларни ишлатди. У мени ақлдан оздирмоқчи эди ва тажрибасизлик қилиб, ўйиндан четлатилишимга сабаб бўладиган хатти-ҳаракатни амалга оширишимни кутганди. Ҳакам яқинлашса, у дарров жимиб қоларди. Лекин мен майдонда Эрон ва Ватаним ҳақида ўйлаб, ғазабимни ютдим ва ўзимни қаттиқ назорат қилдим".
Жаҳон чемпионатидан сўнг, Муртазо ниҳоят ўзининг азалий орзусини амалга оширди ва Европага — Бельгиянинг юқори дивизиони вакили "КАС Эйпен" клубига йўл олди (2018 йил август). Қатарнинг "Aspire Zone" фондига қарашли бу клуб ёш иқтидорлар учун ўзига хос Европага очилган дарвоза вазифасини ўтарди. Аммо Европадаги ҳаёт у ўйлагандек давом этмади. 2019 йилги Осиё Кубоги туфайли у жамоани мавсум ўртасида тарк этишга мажбур бўлди ва терма жамоадан (ярим финалгача етиб бориб) қайтгач, Бельгия клубидаги асосий таркибдаги ўрнини йўқотди.
Футболда вақт ва ўйин амалиёти энг қимматли валютадир. Захирада ўтириш терма жамоадаги жойни йўқотишга ва фаолиятнинг пасайишига олиб келишини тушунган прагматик Пуралиганжи хис-туйғуларни четга суриб, ўйин амалиётини биринчи ўринга қўйди. У яна Қатарга ("Ал-Араби"), сўнгра Хитойнинг "Шенчжен" клубига йўл олди.
"Европада ўйнаш ҳар доим менинг мақсадим ва орзуим бўлган. Лекин мен ҳавода учмайман, шароит ва реалликка қараб иш тутаман. Мен ҳеч қачон фақатгина ном учун захира ўриндиғида ўтирадиган жойга бормайман. Футбол бу бир сония, бир дақиқа ва бир ўйин; тугади ва кетди. Агар сен майдонда ўйнасанг ҳамма сени яхши кўради. Агар ўйнамасанг, ҳеч ким ҳатто сенга қайрилиб қарамайди ҳам. Ҳаётинг ва футболинг учун яхши бўлган жойда, ўзингни кўрсата оладиган жойда бўлишинг шарт".
Ҳар бир профессионал спортчи фаолиятидаги энг қўрқинчли, унинг карьерасига нуқта қўйиши мумкин бўлган сўз бу — Хочсимон пайнинг узилиши. 2021 йил июль ойида Хитой чемпионати доирасида "Шенчжен" ва "Циндао" ўртасидаги ўйинда 29 ёшли Пуралиганжи чап оёғидан айнан шу мудҳиш жароҳатни олди. Тиббий статистика ва спорт физиологиясига кўра, ACL жароҳати спортчини камида 9-12 ойга сафдан чиқаради ва операциядан сўнг аввалги спорт формасига қайтиш ўта машаққатли, баъзида эса имконсиз жараёндир.
Хитойнинг қатьий ва чекланган Ковид карантинлари даврида, оиласи ва ватанидан узоқда бундай оғир жароҳат билан ёлғиз юзма-юз келиш инсонни руҳан синдириши, тушкунликка тушириши ҳеч гап эмасди. У роппа-роса 426 кун расмий футбол ўйнамади. Лекин Муртазо жисмоний оғриқни ва руҳий бўшлиқни китоблар ёрдамида енгишга қарор қилди. У доимо китоб ўқишни хуш кўрадиган камсонли интеллект эгаси бўлган футболчилардан эди, жароҳат даврида эса мотивацион ва психологик адабиётлар унинг асосий қуролига айланди.
"Роппа-роса 426 кун расмий равишда ўйнамаган эдим. Жуда оғир жароҳатдан сўнг, кўпчилик менга салбий энергия юбориб, фаолиятим тугаганини айтиб, мени футболга қайтишдан совутмоқчи бўлишди. Лекин мен ҳаётимни китоб билан қурдим. Доим ишлатадиган бир гапим бор: 'Ўз ҳаётингнинг қаҳрамони бўл'. Мен танамга машғулот ёки ошқозонимга овқат берганим каби, миямга ҳам озуқа беришим керак. Мен рақобатлашадиган ягона инсон – бу фақатгина ўзимдир. Эрталаб уйғонганимда ибодатдан сўнг албатта китоб ўқийман. Кучли ирода, ўз устимда ишлаш ва Худонинг марҳамати билан майдонга қайтишга муваффақ бўлдим".
426 кунлик сукунат ва тикланиш жараёнидан сўнг, 2022 йилнинг ёзида Муртазо Эронга, мамлакатнинг энг кучли ва машҳур клубларидан бири — "Персеполис"га эркин агент сифатида қўшилди. Бу кўпчилик кутмаган, мўъжизавий қайтиш эди. У жамоанинг асосий устунига айланди, Эрон лигасида юқори савияда ўйнади ва энг муҳими — Қатарда бўлиб ўтган 2022 йилги Жаҳон чемпионатида иштирок этиш ҳуқуқини қайтариб олди.
Қатардаги мундиалда у Англия, Уэльс ва АҚШ терма жамоаларига қарши мардонавор ҳаракат қилди. Бироқ унинг қарашлари фақат майдон билан чекланмади. Эрондаги ижтимоий муаммолар, хусусан, аёлларнинг стадионларга кириши билан боғлиқ масалалар уни доим ўйлантириб келарди. У онасини қанчалик яхши кўрса, унинг ўйинларини стадиондан кўра олмаслиги унга шунчалик алам қиларди. Шунингдек, у сўзнинг кучи ва ижобий энергия ҳақидаги қарашлари билан терма жамоа кийиниш хонасидаги муҳитни ўзгартиришга уринди.
"Оилаларимиз, оналаримиз стадионга келиши барчамизнинг энг буюк орзуимиз. Онам Озодий стадионига келиб ўйинимни кўришни орзу қилади. У Эрондан ташқаридаги БАА ва Қатардаги ўйинларимга келганди, лекин ўз уйимизда эмас... Мен доим айтаман, инсон фақат тўғри ва ижобий энергияга эга сўзларни ишлатиши керак. Олдинлари кийим алмаштириш хонасида 2:0 ютаётганимизда баъзилар 'Йигитлар, гол ўтказиб юбормайлик!' дерди ва биз майдонга тушиб гол ўтказиб юборардик! Лекин кейин биз буни ўзгартириб, 'Гол ўтказиб юбормайлик' дейиш ўрнига, 'Кейингисини ҳам урайлик, олдинга борайлик' дейдиган бўлдик. Миянгизни чекламанг, доим олдинга интилинг!"
Муртазо Пуралиганжи ва Ўзбекистон миллий терма жамоаси ўртасидаги тарих алоҳида бир саҳифага жо бўлгулик драмадир. Тақдир ҳазилини қарангки, бугун Тошкентнинг "Пахтакор" клуби шарафини ҳимоя қилаётган эронлик ҳимоячи, вақтида ўзбек ҳужумчилари учун энг ўтиб бўлмас ва шафқатсиз тўсиқ вазифасини ўтаган. Унинг фаолиятида Ўзбекистонга қарши ўтказилган асосий тўртта катта ўйин бор ва уларнинг ҳар бири майдондаги муросасиз жанглар билан ёдда қолган.
Илк бор у Ўзбекистонга қарши 2015 йили Тошкентда кечган ўртоқлик баҳсида майдонга тушган эди. Ёш ва ғайратга тўла Муртазо ўша куни ҳимояда қаттиққўллик билан ўйнаб, жамоасининг 1:0 ҳисобидаги ғалабасига ҳисса қўшди. Бу унинг Тошкент майдонларидаги илк синови эди.
Орадан кўп ўтмай, 2016 йилда Жаҳон чемпионати саралаши доирасида у яна Тошкентга келди. Жуда оғир ва асабий кечган ўша баҳс ҳам Эроннинг кичик ҳисобдаги ғалабаси билан тугади ва Пуралиганжи мудофаа марказида ўзининг ҳақиқий етакчилик хусусиятларини намоён этди.
Энг эсда қоларли тўқнашувлардан бири эса 2017 йилнинг июнида Теҳрондаги "Озодий" стадионида рўй берди. Ўзбекистон терма жамоаси учун ҳаёт-мамот масаласи бўлган ўйинда Эрон 2:0 ҳисобида зафар қучиб, мундиал йўлланмасини нақд қилди. Ўша оқшом Муртазо энг кучли ўйинларидан бирини ўтказиб, рақибга ҳеч қандай имконият қолдирмади.
"Ўзбекистонликлар учун ягона имконият шу ўйинда ғалаба қозониш эди, аммо бизнинг ҳимоя бузиб бўлмас қалъага айланди", – дея эслайди у ўша драматик кечани.
Унинг Ўзбекистон билан тўртинчи бор юзма-юз келиши яна Тошкентда, 2023 йилги тарихий "CAFA Nations Cup" мусобақасининг финалида юз берди. Ўша оқшом "Миллий" стадионида ўн минглаб мухлислар кўз ўнгида Муртазо Эрон мудофаасини мустаҳкам ушлаб, Ўзбекистон терма жамоасининг кетма-кет қилган ҳужумларини йўққа чиқарди. Якунда Эрон 1:0 ҳисобида ғалаба қозониб, кубокни боши узра кўтарди.
34 ёшга тўлган, кўпни кўрган фахрий Муртазо Пуралиганжи ўзининг улкан тажрибасини Тошкентнинг "Пахтакор" клубига олиб келди. 2026 йилнинг августида Тошкент клуби у билан йил охиригача мўлжалланган шартнома имзолади.
Унинг Тошкентдаги старти воқеаларга ва зиддиятларга бой бўлди. Суперлигадаги дебютини Қаршининг "Насаф" клубига қарши (2:1 ғалаба) муваффақиятли ўтказган бўлса, ОЧЛ Элит доирасида 2026 йил 14 сентябрь куни Саудия Арабистонининг қудратли "Ал-Аҳли" клубига қарши сафарда кечган қийин учрашувда (1:1, Фламарион ва Фирас Ал-Бурайкан голлари) тажрибаси билан жамоага катта ёрдам берди. Шунингдек, ички лигада "Машъал"га қарши ўйиннинг 10-дақиқасидаёқ қўполлиги учун қизил карточка олиб майдонни эрта тарк этганига қарамай, "Пахтакор" 10 киши бўлиб 2:1 ҳисобида иродали ғалабани қўлга киритди. Бу футболнинг кутилмаган бурилишлари ва унинг фаолиятидаги драмалар ҳали ҳам давом этаётганидан далолатдир.
Оқил Абдубарноев тайёрлади.
