Отабек Жўрақўзиев: “Мухлисларимизни Суперлига ва ОЧЛ учрашувларида хурсанд қиламиз”

Отабек Жўрақўзиев куни кеча клуб матбуот хизматига интервю берди.

- Отабек, “Андижон“нинг янги аъзоси сифатида ўзингизни қандай ҳис қилмоқдасиз?

- Ассалому алайкум! Жамоага қўшилганимдан хурсандман. Ўзимни жуда аъло равишда ҳис қилмоқдаман.

- Машғулотларда ва жамоанинг ичида кўрдикки, сиз худди олдиндан “Андижон“да ўйнаётгандек, эски футболчилардек тасаввур уйғотяпсиз. Мослашиб кетиш ортиқча муаммо туғдирмади, назаримда, шундай эмасми?

- Мослашиш қийин бўлмаяпти. Чунки жамоадаги айрим футболчилар билан бирга ҳаракат қилганмиз, айримлари билан олимпия термасида бирга ўйнаганмиз. Шу боис мослашиш қийин кечмаяпти.

- Аслида “Пахтакор“дан кетишингиз ва “Андижон“га ўтишингиз нима билан боғлиқ?

- Қисқа қилиб айтганда, ўйин амалиёти.

- Жамоа мухлисларига қандай айтар сўзингиз бор?

- “Андижон” мухлислари марказий Осиёда енг зўрларидан деб биламан. Бундай мухлис тўла майдонда ўйнаш ҳар доим ёқимли бўлган. Уй учрашувларини интиқлик билан кутмоқдаман.

- Максим Шацких ҳам кучли ҳужумчи бўлган ва энди сиз унинг қўл остида ўйнайсиз. Сиз ҳам ҳужумчисиз ва бу ҳол Шатских бошчилигида янада “очилишингиз“га хизмат қилади, деб ўйлайсизми?

- Албатта, Максим Шацких қўл остида “Пахтакор”да ҳам ўйнаганман. Кўп нарсаларни ўргатганлар. Ҳозир ҳам ўрганяпман ва яна ўрганишда давом этаман.

- Шацкихнинг ўйинларини эслай оласизми? Масалан, қайси ўйинлари ёки голларини?!

- Биз у пайтда ёш бўлганмиз. Лекин телефон орқали кўрганман. Миллий термада энг яхши тўпурарлардан бири бўлган. Голларига келсак, энг машҳур голларидан бири “Реал” Мадридга урган голларини кўрганман.

- “Андижон“ сафида дастлабки ўртоқлик ўйинида майдонга тушдингиз, қандай таассурот қолдирди?

- Биринчи учрашувни ўтказдик, яхши ўйин бўлиб ўтди, деб айта оламан. Ҳозир жисмоний юкламалар билан ҳаракат қиляпмиз, камчилик ҳам бўлди. Лекин уни устида ишлаб, мухлисларимизни Суперлига ва ОЧЛ учрашувларида хурсанд қиламиз.