19 ёшли вингер мусобақага соннинг орқа мушаги жароҳати билан келди ва ЖЧ старти олдидан тахминан 8 ҳафтани ўтказиб юборди. Луис де ла Фуэнте турнирнинг илк босқичларида футболчидан эҳтиёткорлик билан фойдаланди, шунга қарамай, Ямаль 8 та ўйинда майдонга тушиб, 1 та гол урди, 35 та муваффақиятли дриблинг ижро этди (мусобақада энг яхши кўрсаткич) ва Испанияга чемпионлик унвонини қўлга киритишда ёрдам берди.
“Ростини айтсам, йўқ, биз ушбу турнирда унинг энг яхши версиясини кўрмадик. Мен учун энг яхши Ламин — бу икки мавсум олдин кўрганим.
У ҳали жуда ёш, мундиалга эса жароҳатдан сўнг ва деярли 8 ҳафталик ўйинсиз танаффусдан кейин келди. Бу жуда оғир: шунча вақт майдонга тушмасдан, кейин дарҳол бундай даражада ўйнашинг керак бўлса, тўлиқ машғулотлар учун вақт деярли қолмайди. Лекин у ажойиб маҳорат кўрсатди. Испания футболчилари Ламинга ёрдам беришди, Ламин эса бутун жамоага ёрдам берди. Менимча, бу идеал ҳамкорлик бўлди”, – деди Левандовски ESPN'га берган интервьюсида.
Польшалик ҳужумчи, шунингдек, “Барселона”да бирга ўйнаган кўплаб футболчилар билан яхши муносабатда бўлгани сабабли турнирда Испанияга мухлислик қилганини таъкидлади.
“Мен Испания терма жамоасининг кўплаб футболчиларини биламан ва клубда улар билан кўп вақт ўтказганман, шунинг учун уларга мухлислик қилдим. Аргентина терма жамоасидан фақат Мессини шахсан биламан холос, лекин у Жаҳон чемпионатини ютиб бўлганди, шу сабабли Испанияга мухлислик қилдим. Инсонлар билан бирга ўйнаганингда ва улар билан кўп вақт ўтказганингда, уларни қўллаб-қувватлаш осонроқ бўлади. Мен хурсанд бўлдим, чунки уларнинг Жаҳон чемпионатини ютишга тайёр эканини билардим. Улар жуда ёш ва олдинда уларни буюк келажак кутмоқда”.
