Одил Абдумажидов: "Хато қилишга ҳаққимиз йўқ, "Қўқон-1912" билан 6 очколик ўйин бўлади"

Ғузорнинг "Шўртан" клуби ҳам элитада қолишга астойдил бел боғлаган. Элдор Мойлиев шогирдлари 17-турда юқори ўринларга интилаётган "Бунёдкор" билан сафарда бир очкони қўлга киритди. Учрашувдан сўнг "Шўртан" ҳимоячиси Одил Абдумажидов фикрларини билдирди.

- "Бунёдкор"га қарши меҳмонда ўйнаш қанчалик қийин бўлди? Ўйин ҳақида хулосалар қандай, хотиржамликда фикрлар ҳам бошқача бўлса керак? 

-  "Бунёдкор" тактик жиҳатдан яхши жамоа ҳисобланарди. Улар бекорга юқори ўринларга курашаётгани йўқ. Анчагина қийин ўйин ўтказдик дея оламан. Шунга қарамай муносиб қаршилик кўрсата олдик. 

- Қўлга киритилган бир очкода нима кўпроқ рол ўйнади? 

- Бу ўйинда "Хоразм"га қараганда йигитларнинг кўзи ёниб турди. Майдонда борларини беришди. 

- "Шўртан" учун ҳар бир ўйин финал. Бу босим юклаши аниқ. Ўйинда бу муаммо туғдирмаяптими? 

- Тўғри, айрим эпизодларда муаммо туғдиряпти, чунки хато қилишга ҳаққимиз йўқ. Бу йўлни ўзимиз танладик. Насиб қилса, "Шўртан"ни Суперлигада олиб қоламиз. 

- Навбатдаги ўйин "Қўқон-1912"га қарши бўлади... 

- Чемпионатдаги энг қийин ўйин кутмоқда. Қўқонликлар ҳам биз каби ҳолатда. Умумий қилиб айтсам 6 очколик ўйин бўлади.