- Ўйин ҳақида фикрингиз?
- Оғир ўйин кечишини билардик. Рақибимиз "Металлург" яхши жамоа, таркибида Суперлигани кўрган бир нечта тажрибали ўйинчилар бор. Биринчи таймда гол уриб олганимиз яхши бўлди. Иккинчи бўлимда ҳам гол уришга ҳаракат қилдик. Ўйиннинг охирлари асабий тус олди. Йигитларга охиригача туриб беришгани учун раҳмат айтиб қоламан. Ўз навбатида мухлисларимизни ғалаба билан табриклайман. Олти очколи ўйинда ғолиб чиқдик деб айта оламан.
- "Арал" биринчи даврани пешқадам сифатида якунлади. Ичингиздан нималар ўтяпти?
- Мағлубиятсиз серия давом этаётганидан хурсандман. Балки футболчилик пайтимда шундай серия бўлгандир, лекин мураббийлик соҳасида бунга биринчи марта дуч келиб турибман. Шу боис яхши ҳиссиётларни бошдан кечиряпман ва ўзим ҳам ҳайрон қоляпман. Мураббийлик осон эмас, доим бир нарсаларни ўйлаб юрасиз. Бўлиб ҳам жамоамиз олдига катта мақсад қўйилган, бу эса кўпроқ масъулиятни юклайди. Йигитлардан кўнглим тўқ, ўйлайманки мағлубиятсиз серия ҳали давом этади.
- Руслан Қалмағамбетов ҳақида фикрингиз?
- Руслан жамоага кўп фойда келтиряпти. Бугун ҳам унинг голи уч очко олиб келди. У ҳам вингер, ҳам марказий ҳужумчи сифатида ўйнай олади. Марк Краснов захирадан тушгач, иккаласи чиройли тандем бўлди деб ўйлайман.
- Жамоангиз ўйини Суперлига даражасига қай даражада яқин деб оласиз?
- Шуни айтишим мумкин, Пролигадаги энг кучли жамоа бизмиз. Лекин тан олиш керак, Суперлигада яхши иштирок этиш учун Суперлига даражасидаги футболчилар керак бўлади. Агар биз Суперлигага чиқсак, таркибни тубдан ўзгартирмаймиз. 70 фоиз ҳозирги футболчилар қолади. Қарийб тўрт йилдан бери бир жамоа бўлиб ўйнаб келяпмиз ва бирданига ўйинчилардан воз кечиш тўғри иш бўлмайди.
