Ўйиндан кейин "Арал" бош мураббийи Неъматилло Қутибаев матбуот анжуманида иштирок этди.
- Ўйин ҳақида фикрингиз?
- Учрашув тўлиқ жамоамиз устунлигида кечди. Ҳар икки таймда йигитларимиз яхши ҳаракат қилишди. Буни якуний ҳисоб ҳам айтиб турибди. Агар вазиятлардан фойдаланганимизда кўпроқ гол урган бўлардик.
- "Арал" қаторасига икки ўйиндан бери гол ўтказмасдан ғалаба қозоняпти. Шу ҳақда фикрингиз?
- Биз учун ўйинлар осон ўтмаяпти, ҳар бир баҳсда нимадир муаммо кузатиляпти. Охирги икки ўйинда кўп вазиятлар яратдик. Баъзан ўйин давомида битта вазият бўлиши мумкин, баъзан эса кўпроқ вазият бўлади. Биз ҳимояни унутмаган ҳолда ўз имкониятимиздан фойдаланишга ҳаракат қиляпмиз.
- Жамоа ҳужумчиси Руслан Қалмагамбетов тўпурарлар орасида биринчи ўринда боряпти. У бугун иккита гол урди. Ушбу футболчи ҳақида нима дея оласиз?
- Руслан кўп гол уришини неча йилдан бери кутдик. Яхши биласиз, у иккинчи лигадан келган. Жамоамизга тезда киришиб кетди, йиғин пайти ўзини кўрсатди ва машғулотларда ҳам яхши ҳаракат қиляпти. Русланда имконият катта ва кучли ҳужумчи бўлади деб ўйлайман.
- Бугунги рақиб "Пахтакор фарм" ҳақида нима дейиш мумкин?
- Биргина ўйиндан келиб чиқиб фикр айтиш қийин. Чунки битта дарвозага ўйин бўлди. Жамоада ёшлар ҳаракат қиляпти ва шу орқали ўсиб боради. Биламизки, "Пахтакор" ҳар кимни ҳам чақиравермайди, бу футболчиларда ҳам истеъдод бор деб ўйлайман.
- Биринчи таймда жамоангиз кўп бор прессинг намойиш қилди, лекин иккинчи бўлимда шуни кўрмадик.
- Биз ҳар бир ўйинда прессинг орқали рақибга босим ўтказишга ҳаракат қиламиз. Агрессив футбол ўйнаймиз. Энди барибир ҳисоб 3:0 бўлганидан кейин прессинг камайди. Футболчиларимиз эркинликка берилди.
- Кейинги тур "Жайхун"га қарши дерби бўлади.
- Дерби ўз номи билан дерби. Ўтган йил "Жайхун"га қарши баҳслар анча қизиқ кечганди. Бу йил ҳам яхши тўқнашув кўрамиз.
