- Ўйин ҳақида фикрингиз?
- Авваламбор "Шўртан" жамоасини ғалаба билан табриклайман. Биз дастлабки 20 дақиқада ўз ўйинимизни намойиш эта олдик. Умуман олганда, биринчи тайм ўзимиз ўйлагандек кечди. Иккинчи таймда ҳам яхши ўйин кўрсатишга ҳаракат қилдик. Ҳатто ҳисобни тенглаштиришга муваффақ бўлдик. Лекин дарвозабонимизнинг иккита хатоси туфайли голлар ўтказиб мағлуб бўлдик.
- Жамоангиз иккита чиройли гол урди. Лекин ўз навбатида хатоли иккита гол ўтказди. Буни қандай изоҳлайсиз?
- "Шўртан"га урилган иккита голда рақиб дарвозабони хато қилди демаган бўлардим, чунки зарбалар чиройли чиқди. Биз ўтказган голда эса дарвозабонимиз хатога йўл қўйди деб ўйлайман. Буни албатта видеотакрорлар орқали яна таҳлил қилиб чиқамиз. Тўғриси, 2:2 пайти дарвозабонимиз оддийроқ ўйнаши керак эди. Ўтказиб юборилган голда у тўпни майдон ташқарисига тепиб юборса ҳам бўларди. Биз битта гол уриб яна ҳисобни тенглаштиришимиз мумкин эди, лекин икки бор ўтказганимиз ортиқча бўлди.
- Бугун жамоангиз сафида собиқ "Шўртан" футболчилари ўйнади. Улар қай даражада ёрдам бера олишди?
- Энди бу футбол ва ўйинчилар бир жамоадан иккинчисига ўтади. Профессионал футболчи қайси жамоа либосини кийиб майдонга чиқмасин, фақат ўз жамоаси манфаатини ўйлайди. Аксар футболчилар шундай ўйинлар орқали ўзларининг собиқ жамоаларига ниманидир исботлашга ҳаракат қилишади ва бу улар учун мотивация бўлади. Бугун "Шўртан"дан келган футболчилар яхши ўйин кўрсатишди.
