- Ўйин ҳақида фикрингиз?
- Учрашув курашларга бой кечди. Ҳар икки жамоа ўзининг энг яхши ўйинини кўрсатишга ҳаракат қилди. Биргина хатойимиз пенальтига олиб келди. "Арал"ни яхши ўргангандик, кучли ва кучсиз томонларини таҳлил қилгандик. Жамоа биз кутган ўйинни намойиш этди, биз ҳам шунга мос қаршилик кўрсатишга ҳаракат қилдик. Ўйин битта голгача бўлди. Вазиятларимиз деярли бўлмади, бўлса ҳам яримта вазият бўлди. "Арал" жамоасини ғалаба билан табриклайман.
- Бугунги ўйин билан биринчи давра тугади. "Металлург" Суперлигани мақсад қилган, лекин биринчи даврадан кейин ҳатто учталикда бормаяпти.
- Биз эгаллаб турган ўрнимизга лойиқ эмасмиз. Омад негадир келмаяпти. "Ғазалкент", "Шўртан", "Жайхун" клублари билан мағлубиятга учрадик. Баъзи учрашувларда кутилмаганда дуранг қайд этдик. Ҳали ҳаммаси олдинда, яна 13та ўйинимиз бор. Асосий рақобатчиларни бу сафар уйда қабул қиламиз. Клубимиз ўз мақсадидан воз кечгани йўқ, биз Суперлигани ният қилганмиз. Пешқадам билан фарқимиз 14 очко бўлиб қолди, футболчилар ва мураббийлар билан йиғилиб биринчи даврадаги иштирокни таҳлил қилиб чиқамиз. Буёғига яна "боксинг дэй" кетади, биз эса кейинги баҳсларда ўзимизни кўрсатишга ҳаракат қиламиз.
- Ёзги трансферлардан кўнглингиз тўлдими?
- Сифатли футболчиларни қўлга киритдик деб ўйлайман. Яқинда Нажмиддин Нормуродовни қўшиб олдик. Клубимиз раҳбариятига раҳмат: биз хоҳлаган ўйинчиларни олиб беришди. Энди буёғига фақат ишлаш керак.
- Нима учундир "Металлург" битта рельсга туша олмаяпти. Жамоага нима етишмаяпти?
- Охирги учта ўйинимизни оладиган бўлсак, турли натижалар қайд этдик. "Ғазалкент" билан ўйинни олайлик, 2:0 ҳисобида олдинда боратуриб якунда ютқазиб қўйганимизни ҳалигача ҳазм қилолмаяпман. Агар захирадан биз мураббийлар тушганимизда ҳам учта гол қўйиб юбормасдик. Сўнгра "Лочин"ни ютдик, лекин бугун яна ютқаздик. Суперлигага чиқиш бўйича даъвогарлар қаторида "Арал" қатори ўзимизни ҳам кўряпман. Керакли футболчиларни олиб бўлдик, бошқа трансфер қилмаймиз. Буёғига қўл остимиздаги мавжуд таркиб билан ўзимизни кўрсатишга ҳаракат қиламиз. Биз учун ортга йўл қолмади.
