"Нефтчи" ва "Андижон" офсайддан гол урдими? Суперлиганинг илк туридаги ҳакамлик таҳлили

✅ "Бухоро" – "Қўқон-1912"

Бурчак зарбасидан сўнг позиция учун одатий кураш кечмоқда. "Қўқон-1912" ҳимоячиси ҳам қўлларидан фойдаланди, сўнгра у ўз ташаббуси билан йиқилди. "Бухоро" футболчисини жазолашга асос йўқ, гол қоида бузилмасдан киритилди.

ВИДЕОЛАВҲАНИ КЎРИШ

❓ "Андижон" – "Сўғдиёна"

Қанот ҳаками учун жуда мураккаб вазият. Визуал жиҳатдан тўп киритган "Андижон" футболчиси ўнг оёғи билан офсайдга кириб қолгандек кўринмоқда. Аммо буни юз фоизлик ишонч билан тасдиқлай олмаймиз – бунинг учун офсайд чизиқлари керак.

ВИДЕОЛАВҲАНИ КЎРИШ

❓ "Нефтчи" – "Машъал"

Бу ерда ҳам "нозик" вазият. "Нефтчи"нинг гол урган футболчиси ўйиндан ташқари ҳолатда бўлган деган тасаввур уйғонмоқда. Унинг елкаси ва оёғи "Машъал" ҳимоячисига қараганда дарвозага бироз яқинроқ эди. Бу ерда ҳам офсайд чизиқлари тортилиши зарур.

ВИДЕОЛАВҲАНИ КЎРИШ

✅ "Динамо" – "Навбаҳор"

Қулай позицияда турган ҳакамнинг мутлақо тўғри қарори. Классик ҳолат: "Динамо" ҳимоячиси тўпни тепиб юбормоқчи бўлди, лекин "Навбаҳор" ҳужумчиси ундан олдинроқ тўпга тегинишга улгурди ва оёғига зарба қабул қилиб олди. Бу вазиятда пенальти белгилашдан бошқа қарор бўлиши мумкин эмасди.

ВИДЕОЛАВҲАНИ КЎРИШ

✅ "Динамо" – "Навбаҳор"

Бизнингча, ҳакам ўйинни давом эттириб тўғри қилди. Агар "Динамо" ушбу вазиятда гол урганида ҳам ҳисобга олиш керак эди. Тўғри, мезбонлар ҳужумчиси қўли билан "Навбаҳор" ҳимоячисининг орқасига тегинган. Бироқ бу йиқилиш учун етарли эмас, шунчаки одатий кураш содир бўлган. Бундай яккакурашда "Динамо" ўйинчисининг рақибга қанчалик даражада таъсир ўтказганини бошқа камера ракурси орқали аниқроқ баҳолаш мумкин эди. Мавжуд ракурслардан кўриб турганимиздек – ўйин давом эттирилиши лозим.

ВИДЕОЛАВҲАНИ КЎРИШ

✅ "Локомотив" – "Сурхон"

Даставвал ҳакам "Сурхон" футболчисини четлатмай, хатога йўл қўйди. "Локомотив" ҳужумчиси тўпни олдинга ташлади, иккинчи ҳимоячи эса узоқда эди. Бу яққол гол уриш имкониятини йўққа чиқариш ҳисобланади. Лекин ҳакамнинг бахтига, уни монитор ёнига чақиришди: тўпни қабул қилиш вақтида "Локомотив" ҳужумчиси қўл билан ўйнаган экан. Натижада бош ҳакамнинг якуний қарори тўғри бўлиб чиқди – сариқ карточка бекор қилинди (гарчи у бошида қизил бўлиши керак бўлса ҳам) ва қўл билан ўйналганлиги сабабли жарима зарбаси белгиланди.

ВИДЕОЛАВҲАНИ КЎРИШ

Шу тариқа, Суперлиганинг 2026 йилги мавсуми 1-тур учрашувларида ҳакамлар қўпол хатоларга йўл қўйишмади. Бироқ камида иккита эпизод – “Андижон” ва “Нефтчи”нинг голлари баҳсли бўлиб чиқди. Бу вазиятларда ўйиндан ташқари ҳолат бўлган бўлиши мумкин (офсайд чизиқлари чизиб кўрилиши керак).