❌ "Локомотив" – "Навбаҳор"
Барча тақдим этилган ракурслардан "Локомотив" ҳимоячиси ва "Навбаҳор" ҳужумчиси ўртасида ҳеч қандай контакт бўлганини кўрмаяпмиз. Ҳимоядаги ўйинчи ҳеч қандай қўшимча ҳаракат қилмаган, шунчаки югуриб кетяпти. Бизнингча, ҳакам пенальти белгилаб хато қилди. ВАР тўғри аралашди, аммо ҳакам негадир ўз қарорини кучда қолдирди. "Навбаҳор" ўйинчисини симуляция учун сариқ карточка билан жазолаш керак эди.
✅ ОКМК – "Бухоро"
Гол тўғри ҳисобга олинган. ОКМК дарвозабони тўпга эгалик қилмаётган бир вақтда, "Бухоро" ўйинчиси юқорига сакраб, тўпга ўйнамоқда. Бу ерда дарвозабонга нисбатан хавфли ҳаракат йўқ.
✅ "Нефтчи" – "Насаф"
Такрорий лавҳаларнинг ҳеч бирида "Насаф" ўйинчиси тўпга тегганига 100% ишонч йўқ. Бироқ гол урган бошқа бир ҳужум вакили аниқ офсайдда эди. Кўринишидан, тўп "Нефтчи" дарвозабонига тегиб, ундан "Насаф"нинг иккинчи ўйинчисига қайтган.
Агар фол ҳақида гапирадиган бўлсак, ҳужумдаги ўйинчи яққол фол ишлатмаган. Балки, дарвозабон томонидан қоида бузилишини қайд этиш керак эди. Аммо бу вазиятда у сариқ карточкага ҳам, қизил карточкага ҳам лойиқ эмасди – тўп ҳавода эди ва унга ҳеч ким эгалик қилмаётганди. Агар ушбу яккакурашда "Нефтчи" дарвозабони қўл билан ўйнаган бўлса ҳам, бу қизил карточка эмас.
✅ "Нефтчи" – "Насаф"
"Классик" пенальти. "Нефтчи" ўйинчиси тўпга ўйнамоқда, "Насаф" ҳимоячиси эса кечикиб, унинг оёғига зарба бермоқда. Бизнинг фикримизча, тўғри қарор – интизомий жазосиз (карточкасиз) пенальти белгилаш.
❌ "Пахтакор" – "Динамо"
Баҳсли вазият. Дастлаб ҳакам хатога йўл қўйди ва "Пахтакор" ўйинчисига ҳеч қандай карточка кўрсатмади. Тўғри, биз бу ерда ўйинчининг оғирлиги билан "босиб олиш"ни кўрмаяпмиз, лекин юқори интенсивлик ва зарба берилган нуқта (бутса тишлари билан болдирга) бор. Ўйинчилар қарама-қарши йўналишда ва юқори тезликда ҳаракатланишган, бундай ҳолатда жароҳат етказиш хавфи мавжуд. Бизнингча, бу ерда қизил карточка учун мезонлар кўпроқ.
✅ "Пахтакор" – "Динамо"
Қанот ҳаками "Динамо" ўйинчисида ўйиндан ташқари ҳолатни қайд этиб хато қилди. Бироқ ВАР тўғри аралашди ва бош ҳакам голни ҳисобга олди.
✅ "Пахтакор" – "Динамо"
Бу ерда, бизнингча, ҳакам вазиятни кўриб чиққандан сўнг тўғри қарор қабул қилди ва "Динамо" ўйинчисига сариқ карточка кўрсатди. У ўйламасдан ҳаракат қилди ва контактнинг рақиб учун қандай оқибатларга олиб келишини ҳисобга олмади.
✅ "Пахтакор" – "Динамо"
Бу ҳам осон вазият эмас. "Динамо" ҳимоячиси узатмани тўхтатишга ҳаракат қилиб ташланди. Ҳаракат бошида унинг қўли "таянч" ҳолатида эди, лекин шу билан бирга у қўлини четга чўзишда давом этиб, тана майдонини катталаштирди. Тўғри қарор – пенальти.
Шу тариқа, Суперлиганинг 8-турида ҳакамлар иккита қўпол хатога йўл қўйишди.
