Футболда кўплаб воқеалар содир бўлади. Айримларнинг фаолияти силлиқ кечса, бошқаларники ҳис-туйғуларга, кутилмаган бурилишларга ва ҳаётий сабоқларга бой бўлади. Бугунги кунда "Бухоро" шарафини ҳимоя қилаётган черногориялик вингер Владимир Родичнинг ҳаёти эса ўзига хос драмага бой. 1993 йилда Сербиянинг Белград шаҳрида туғилган футболчи фаолияти давомида кўплаб қийинчиликлар ва ғаройиб воқеаларни бошдан кечирган.
2026 йил бошида "Бухоро" ўз таркибига тажрибали футболчини қўшиб олганини эълон қилди. Унинг ўтмиш саҳифаларида Европанинг кўплаб клублари, жумладан, Чемпионлар Лигасидаги порлоқ ўйинлар мужассам эди.
Рад этилган "Атлетико Мадрид" ва Чемпионлар Лигаси орзуси
Болалигидан футболга меҳр қўйган Владимир фаолиятини "Графичар" ва "Рад" клубларида бошлади. Унинг истеъдоди тезда кўзга ташланди ва унга Испаниянинг машҳур "Атлетико Мадрид" клубидан таклиф тушди.
Бутун умр хотирамдан ўчмайдиган, юрагимни ҳалигача жиззиллатадиган ягона расмий таклиф айнан "Атлетико Мадрид"дан келган эди! Қўлимга шартномани тутқазишганда, кўзларимга ишонмадим... Бу воқеа "Малмьё"га кетишимдан сал олдин рўй берганди.
Ўша лаҳзада ҳайратдан тош қотдим, ичимда нимадир портлагандек бўлди! Ҳаяжон ва эҳтиросдан бутун вужудим "ёниб кетди"! Қўлларим қалтираб, дарҳол собиқ агентим Владонинг рақамини тердим ва бор овозим билан: "Владо, илтимос, буни охирига етказ, нима бўлса ҳам ҳал қил!" – деб бақириб юбордим.
Бироқ бу таклиф фақат ижара асосида Мадридликларнинг В жамоасида ўйнашни кўзда тутарди. Агентининг маслаҳати билан у таклифни рад этди ва Швециянинг "Мальмё" клубига ўтди. Бу қарор унга Чемпионлар Лигасида ўйнаш орзусини амалга ошириш имконини берди.
Қуръа, Златаннинг либоси ва Роналду билан тунги учрашув
"Малмьё" билан Чемпионлар Лигаси гуруҳ босқичига чиққан сербиялик футболчи ҳақиқий байрамни ҳис қилди. У гуруҳда айнан дунёнинг энг кучли клубларига қарши ўйнашни истарди.
Худди кечагидек эсимда: Никола Журжичнинг уйида нафасимизни ютиб, қуръа ташлаш маросимини кўз узмай кузатардик... Ҳаяжондан юрагим қинидан чиқай дерди, қоғозга "Реал Мадрид", "Пари Сен-Жермен" ва "Олимпиакос" деб ёзиб олгандим.
Экранда шарлар очилиб, гуруҳимизга бирин-кетин "Реал", "ПСЖ" ва "Шахтёр" тушганини кўрганимда – ичимдаги тўлқинни жиловлай олмадим! Бахт ва ҳайратдан телбаларча бақириб, сакраб юбордим!
Турнир давомида у ўзининг кумирларига қарши майдонга тушди. Париждаги ўйиндан сўнг у швециялик афсона Златан Ибрагимович билан серб тилида суҳбатлашиб, унинг ўнинчи рақамли либосини олишга муваффақ бўлди. Мадридда эса Криштиану Роналду билан ҳам ҳайратланарли воқеа юз берди.
Ҳакамнинг ҳуштаги чалиниши билан юрагим гупиллаб, бор кучим билан том маънода унинг олдига қараб чопдим! У эса хотиржамгина кийим алмаштириш хонасига киришимни айтди – бир сония ҳам кутмай, ортидан шошилдим.
Кирдим, у ҳеч қандай ортиқча гап-сўзсиз, очиқ юз билан ўз либосини менга узатди... Аммо кейинги сонияда содир бўлган нарса мени бутунлай шокка туширди: кутилмаганда у кўзларимга қараб: "Сенинг либосингни олсам майлими?" – деб сўраб қолса бўладими?! Ўша лаҳзада ҳайратдан карахт бўлиб қолдим, томоғимга нимадир тиқилди-ю, тилим калимага келмай қолди!
Энг қизиғи, "Сантьяго Бернабеу"даги 8:0 ҳисобидаги мағлубиятдан сўнг тунги клубга борган "Малмё" футболчилари у ерда яна Криштиану Роналдуни учратиб қолишади.
Атиги икки соат аввал майдонда бизни қандай ер тишлатганликларини эсласак, унинг бу ҳолатимизга ақли бовар қилмади, бутунлай карахт эди...
Бизни кўриши билан кўзлари чақнаб, ҳайратдан ёқа ушлади: "Тўхтанглар, йигитлар, ақлдан оздингизми, айнан нимани нишонлаяпсизлар ўзи?!" – деб юборди. У бундай шовқин-суронга умуман тоқат қилмай, шунчаки шарбат ичиб, дўстлари билан ортиқча ҳиссиётсиз икки оғиз суҳбатлашишни ва ҳеч қанча ўтмай ширин уйқуга кетишни хоҳлаётганини айтиб қолди.
Златан Ибрагимович
Кейинчалик, 2020 йилдаги пандемия даврида Родич Стокгольмнинг "Хаммарбю" клубида ўйнаб юрганида Златан Ибрагимович клуб машғулотларига қўшилади. Афсонавий ҳужумчининг профессионаллиги ва машғулотларга ёндашуви Родичда катта таассурот қолдирди.
Унинг бизга бўлган муносабатини кўриш, қандай машғулот ўтказишини ҳис қилиш шунчаки ақл бовар қилмас даражада қизиқ ва ҳаяжонли эди... Худойим, қандай юқори маҳорат, қандай даҳшатли профессионал бу!
Ҳар бир ҳаракат, ҳар бир сония тўлиқ 200 фоизлик куч ва иштиёқ билан ўтарди. Оддийгина "квадрат" ўйинида ҳам заррача ҳазилга, бўшашишга ўрин йўқ – майдон том маънода олов бўлиб ёнарди!
Очиқкўнгиллик ва трибуналарни жим қилиш
Родич ўзининг ҳиссиётга берилувчан ва болқонликларга хос характери билан ҳам машҳур. Бир сафар у ўз жамоасига фойда келтирадиган ўйинда рақиб клуби "Гётеборг"нинг либосини кийиб, пабда мухлислик қилгани шведлар орасида катта можарога сабаб бўлган эди.
Мен ҳар доим кўнглидагини очиқ-ойдин гапирадиган, сиёсатдонлик қилиб пардозлаб ўтирмайдиган одамман – сохталикни заррача ёқтирмайман...
Аммо мени "Гётеборг" либосида суратга тушириб олишди-ю, шунчаки эмас, айнан иғво ва тўполон кўтариш учун атайлаб ижтимоий тармоқларга тарқатиб юборишди! Бундай ғаразли ҳаракатдан нафратим қайнаб кетди.
Яна бир азалий рақиб "АИК" мухлисларининг ҳақоратли сўзлари ва ирқчилик кайфиятидаги ҳужумларидан сўнг, у майдонга тушиб уларнинг дарвозасига иккита гол урди ва трибуналарни жим бўлишга мажбур қилди.
Ичимда нафрат ва қаҳр-ғазаб худди вулқондек отилиб, ҳамма ёқ олов бўлиб ёнарди! Биринчи тўпни тўрга қадашим билан бошимдан ўтган барча хўрликлар бир лаҳзада кўз ўнгимдан лип этиб ўтди...
Дарҳол уларнинг трибунаси томон шахд билан ўгирилдим-да, кўзларига тик боқиб, кўрсатгич бармоғимни лабимга босдим. Бутун стадионни тиз чўктириб, музлатиб қўядиган совуққина сукунат ва сукутга чўмдириш ана шу лаҳзадан бошланди!
Муваффақиятсизликлар ва руҳий сабоқлар
Фаолияти давомида доим ҳам ҳаммаси силлиқ кечмаган. Туркиянинг "Карабюкспор" жамоасига "Ювентус" собиқ мураббийи Игор Тудорнинг таклифи билан ўтган вингер у ерда ўзини топа олмади.
Тўсатдан телефон жиринглаб қолди – бегона, номаълум рақам. Гўшакни кўтарсам: "Алло, Владимир, бу Игор Тудор – «Карабюк» бош мураббийи", – деган жиддий овоз янгради.
У менинг ўйинларимни диққат билан кузатганини, қанотда айнан мендек шиддатли, курашчан ўйинчи ҳаводек зарурлигини айтганида ичимда умид ва ҳаяжон уйғонди... Бироқ, афсуски, тақдир экан – бир-биримизга тўғри келмадик.
Туркиядаги фаолияти унинг учун жиддий руҳий синов бўлди. Майдонга кам тушиши уни тушкунликка туширган бўлса-да, бундан ўзига керакли хулосани чиқара олди.
Туркиядаги фаолиятим давомида шундай оғир, азобли синовларга дуч келдимки, уларни эслашнинг ўзи юракни эзади. Асосий таркибдан четда қолиб, майдонга туша олмаслик руҳиятимни том маънода эговлар, ич-этимни еб юборарди...
Аммо бу зарбалар мени синдира олмади – аксинча, ҳар қандай ҳолатда ҳам тишни тишга қўйиб, таслим бўлмасликни ўргатди! Ўша дамларда кўзим очилди: инсон учун ҳаммасидан ҳам пул эмас, балки майдонга тушиб, тўп суриб чинакам бахтни ҳис қилиш дунёдаги энг буюк неъмат эканлигини бутун вужудим билан англаб етдим!
Келишилган ўйинларга қарши
Скандинавияда яшаш унинг ҳаёт тарзини тубдан ўзгартирди. У эрталаб эрта уйғонадиган, ҳар қандай об-ҳавода муздек кўлда чўмиладиган инсонга айланди. Аммо, 2025 йил қишида унинг виждони ва профессионаллиги жиддий синовдан ўтди. "Эстерс" клуби билан шартномаси якунига етаётган Родичга ўйинни сотиш эвазига бошқа жойдан шартнома олиб бериш ҳақида таклиф тушади. Футболчи бу ифлосликка рози бўлмай, скриншотларни омма олдида ошкор қилди.
Бутун фаолиятинг давомида бунақа ғалати ҳикояларни фақат четдан эшитиб, кулиб, ҳазиллашиб юрасан киши...
Бироқ ўз бошингга тушганда ҳаммаси бутунлай бошқача бўларкан! Тўғриси, шу ёшга кириб, шу бугунги кунга қадар менга ҳеч қачон, ҳеч қаердан бунақа ақл бовар қилмас, ғаройиб таклиф тушмаган эди – ҳалигача ўзимга келолмаяпман!
Бу ҳаракати орқали у ҳаммани огоҳлантирмоқчи эди. У бугунги кун ёш футболчиларига шундай мурожаат қилади:
Ҳар қандай вазиятда ҳам фақат ва фақат ўзингизга содиқ қолинг! Ўз қадрингиз, ҳаётий қадриятларингизга бўлган ишончни ҳеч қачон йўқотманг!
Сизнинг самимиятингиз ва ишончингиздан шунчаки сурбетларча фойдаланиб, осонгина оёқости қилиб кетмоқчи бўлган бундай тубан фирибгарларнинг тузоғига асло тушманг, уларнинг навбатдаги мазлум қурбонига айланиб қолманг! Эҳтиёт бўлинг, бошингизни тик тутинг!
Халқаро майдон: Сербиядан Черногорияга қадар
Владимир Родич Сербиянинг Белград шаҳрида туғилган бўлса-да, халқаро майдонда Черногория миллий терма жамоасини танлаган. Унга 2015 йилнинг 2 октябрь куни терма жамоа бош мураббийи Бранко Брнович томонидан илк бор чақирув юборилган. "Мальмё" клубидаги муваффақиятли ўйинлари орқали эътиборга тушган Родич учун бу халқаро даражадаги катта ва муҳим қадам эди.
Родичнинг терма жамоадаги расмий дебюти 2015 йилнинг 9 октябрь куни Подгорица шаҳрида бўлиб ўтган Евро-2016 саралаш босқичи доирасидаги Австрияга қарши учрашувга тўғри келди. Шундан сўнг у миллий жамоа либосида жами 5 та ўйинда майдонга тушди. Вингер позициясида ҳаракат қилган бўлса-да, бу баҳсларда гол уриш унга насиб қилмаган.
Владимир Родичнинг Черногория терма жамоаси сафидаги сўнгги ўйини 2016 йилнинг март ойида Беларусь терма жамоасига қарши кечган ўртоқлик учрашуви бўлиб қолди. Шундан сўнг у терма жамоага бошқа жалб этилмади, бироқ унинг халқаро майдондаги бу қисқа тажрибаси фаолиятидаги энг ёрқин саҳифалардан бири бўлиб тарихга кирди
Алё, "Бухоро"
2026 йилги мавсум бошида "Бухоро" таркибига келиб қўшилган Владимир Родич қисқа вақт ичида жамоа етакчиларидан бири ва мухлисларнинг ёқимтойига айланишга улгурди. Айниқса, унинг сўнгги турлардаги ҳаракатлари ва Суперлига етакчилари дарвозасига киритган голлари чемпионатнинг энг муҳокама қилинадиган воқеаларидан бирига айланди.
"Пахтакор" дарвозасига тривела: 6 август куни Суперлиганинг 16-тури доирасида "Бухоро" Тошкентда "Пахтакор" меҳмони бўлди. Мезбонларнинг 2:0 ҳисобидаги устунлиги билан ўтаётган учрашувнинг 75-дақиқасида Родич оёғининг ташқи қисми (тривела услуби) билан ажойиб супергол урди. Бу гол бухороликларнинг камбэкини бошлаб берди ва ўйин 2:2 ҳисобидаги дуранг билан якунланди.
Чемпион "Нефтчи"ни тор-мор этишда иштирок этди: Орадан кўп ўтмай, 18 август куни "Бухоро" ўз майдонида амалдаги чемпион ва турнир жадвали пешқадами "Нефтчи"ни қабул қилди. 4:1 ҳисобида мезбонларнинг йирик ғалабаси билан якунланган ушбу баҳсда Владимир Родич 90+2-дақиқада ўз номини таблога ёздириб қўйди.
Юбилей гол: Бундан ташқари, Родич апрель ойида 6-тур доирасида "Қизилқум"га қарши кечган баҳсда (2:0) ҳам ўз ҳисобига гол ёздирган эди. Бу гол икки жамоа ўртасидаги тарихий қарама-қаршиликларда "Бухоро"нинг 51-голи сифатида қайд этилди.
32 ёшли ҳужумчи Суперлиганинг 18 ўйинида 5 та гол уриб, 3 та голли узатма амалга оширди.
Оқил Абдубарноев тайёрлади.
