Аввалроқ Португалия клуби 63 ёшли мураббийнинг бош мураббийликдан кетганини эълон қилганди. У "Реал"га қайтади, мадридликлар шартномани муддатидан олдин бекор қилиш учун "Бенфика"га 15 миллион евро тўлаган.
"Менга "Бенфика"да ишлаш имкониятини бергани учун президент Руй Коштага миннатдорлик билдираман. Ушбу клуб шаънини ҳимоя қилиш мен учун шараф ва имтиёз бўлди.
Шунингдек, мен "Бенфика"нинг барча ходимларига намунали профессионаллиги, фидойилиги ва малакаси учун раҳмат айтаман. Бирга ишлаган барча футболчилардан чин дилдан миннатдорман. Уларга энг катта шахсий ва профессионал муваффақиятлар тилайман.
Ишончим комилки, қисқа вақт ичида мустаҳкам ришталарни яратдик: бир марта мен билан фаолият юритган футболчи — абадий менинг ўйинчим", – деди Моуринью.
Португалиялик мураббий 2025 йилнинг сентябридан бери "Бенфика"ни бошқариб келмоқда. Унинг бошчилигидаги жамоа Португалия чемпионатини мағлубиятсиз ўтказди ва турнир жадвалида учинчи ўринни эгаллади.
Моуринью "Реал"ни 2010 йилдан 2013-йилгача бошқарган. У жамоа билан Испания Ла Лигаси, Испания Кубоги ва Испания Суперкубогини қўлга киритган.
