“Шаҳарликлар” раиси Халдун Ал Муборак ушбу мавзуда ўзининг расмий мактубини эълон қилди.
Клуб раисининг мактуби
Мен 18 йилдан бери ушбу клубнинг бир қисмиман. Сизлар билан бирга “Этихад”да, “Уэмбли”да ва Истанбулда бўлиш шарафига муяссар бўлганман. Бу клуб мен учун муҳим, сизлар ҳам “Манчестер Сити” сиз учун қанчалик қадрли эканини қайта ва қайта кўрсатдингиз ҳамда айтдингиз. Бугун сизларга мактуб ёзаётганимнинг боиси ҳам шунда.
Жума кунги ОАВ хабарларидан сўнг, кўпчилигингиз оқшомни дўстларингиз, оилангиз ва ҳамкасбларингизнинг саволларига ҳамда хабарларига жавоб бериш билан ўтказган бўлсангиз керак. Мен ҳам шундай қилдим. Оиламга айтган гапим шу бўлди: Премьер-лига жараёни ҳали узоқ давом этади, клубнинг айбсизлигини исботлашга бўлган ишончимиз ва қаътиятимиз худди бу жараён бошланган илк кундагидек мустаҳкам.
Позициямизга нега бунчалик ишонаётганимизни тушунишингиз учун сизлар билан бўлишишни истаган нарсаларим жуда кўп. Аммо ҳуқуқий жараённинг қатъий маҳфийлиги ва унга ҳурмат билан ёндашишга бўлган қароримиз ҳозирча буни қилишимга йўл қўймайди. Ҳатто ушбу мактуб ҳам қоидаларга мос келишини таъминлаш учун бир нечта ҳуқуқий текширувлардан ўтди.
Сиздан қуйида келтирилган, жума куни эълон қилган баёнотимизни ҳамда 2023 йилнинг февралида чиқарилган баёнотимизни синчковлик билан ўқиб чиқишингизни сўрайман. Ундаги ҳар бир сўз муҳим ва ўз кучида қолади.
Баъзилар шошма-шошарлик билан ўз хулосаларини чиқаришган бўлса-да ва атрофимизда жуда кўп шов-шувлар авж олаётган бўлса-да, ҳеч нарса ўзгаргани йўқ. Биз илгари ҳам биргаликда қийинчиликларга дуч келганмиз ва уларни енгиб ўтганмиз. Клубимизнинг шиддатини сусайтиришни истайдиганлар ҳали ҳам кўп. Биз уларга бундай имкониятни бермаймиз.
Халқаро танаффусдан сўнг бизни ажойиб лаҳзалар кутмоқда. Икки ҳафтадан сўнг “Энфилд”га сафар қиламиз, сўнгра “Иттиҳод” стадионида Чемпионлар лигаси доирасида “Пари Сен-Жермен”ни қабул қиламиз — бу лаҳзалар “Манчестер Сити” оиласининг қудратини нишонлаш учун бизга имконият беради.
Доимий қўллаб-қувватлашингиз учун, ҳамишагидек, ташаккур.
Халдун Ал Муборак
Раис
“Манчестер Сити” футбол клуби
Клуб баёноти, жума, 2026 йил 25 сентябрь
Премьер-лига жараёни давом этмоқда, ҳали бажарилиши керак бўлган муҳим босқичлар бор ва у қатъий маҳфийликка эга. Шу боис “Манчестер Сити” ФКнинг позицияси Клубнинг 2023 йил февраль ойидаги баёнотига тўлиқ мос келади.
Клуб Премьер-лига раҳбарияти ва ижроия органи ҳеч қандай тарафкашликсиз, мустақил, холис ва адолатли тартибга солувчи сифатида ҳаракат қилади деган ишонч билан саккиз йил давомида белгиланган ҳуқуқий жараёнларга қатъий риоя қилиб келди.
Клуб баёноти, 2023 йил февраль
“Манчестер Сити” ФК Премьер-лига томонидан тақдим этилган кенг кўламли ҳамкорлик ва тақдим этилган жуда катта ҳажмдаги батафсил материалларни ҳисобга олган ҳолда, Премьер-лига қоидаларининг гўёки бузилгани ҳақидаги айбловлар эълон қилинганидан ҳайратда.
Клуб ўз позициясини қўллаб-қувватлайдиган инкор этиб бўлмайдиган далилларнинг тўлиқ тўпламини холисона кўриб чиқиш учун ушбу масаланинг мустақил комиссия томонидан ўрганилишини олқишлайди.
Шунингдек, ушбу масалага бир марта ва бутунлай нуқта қўйилишини кутиб қоламиз.
