Инсайдер Николо Скиранинг маълумотларига кўра, инглиз клуби 23 ёшли футболчи учун 125 миллион евро тўлашга тайёр, ўйинчи билан шартнома эса 2032 йилнинг ёзига қадар мўлжалланиши мумкин.
"Ливерпул"нинг Барколяга қизиқиши бежиз эмас: клуб Муҳаммад Салоҳнинг кетишидан сўнг ҳужум чизиғини кучайтириш йўлларини изламоқда ва франциялик футболчини Андони Ираоланинг янги жамоасидаги асосий юлдузлардан бири сифатида кўрмоқда.
Барколя "Лион"дан ўтганидан кейин – 2023 йилдан бери ПСЖ сафида тўп тепиб келмоқда. У Париж клуби либосида 152 та ўйин ўтказиб, 39 та гол ва 35 та голли узатмага муаллифлик қилган, 2025/26 йилги мавсумда эса барча мусобақаларда ўз ҳисобига 13 та гол ва 6 та голли узатма ёздириб қўйган.
