Мисрнинг шикояти арбитр Франсуа Летексьенинг жаҳон чемпионатидаги ишини давом эттиришига таъсир қилмаслиги эҳтимоли катта. Аввалроқ Миср футбол ассоциацияси ЖЧ-2026 1/8 финалида Аргентинага қарши кечган баҳсдаги (2:3) ҳакамлик юзасидан ФИФАга протест йўллаган эди. Летексьенинг айрим қарорларидан норози бўлган африкаликлар франциялик ҳакамлар бригадасини турнирдан четлатишни сўрашган.
L’Équipe нашрининг ёзишича, бу расмий шикоятнинг ҳозирги кўринишида муваффақият қозониш имконияти йўқ, чунки ҳеч бир давлат ҳакамлар бригадасини танлашга вето қўя олмайди – бу масала ФИФА ҳакамлар қўмитаси ваколатига киради. Шунга қарамай, франциялик арбитрнинг иши таҳлил қилинади. Ҳакамлар корпуси раҳбарияти унинг ҳакамлик сифати, расмий шахсларнинг ҳисоботлари ва баҳсли видеоэпизодларни баҳолаган ҳолда Летексьенинг жаҳон чемпионатида ишини давом эттириши ёки этмаслиги бўйича қарор қабул қилади.
Французнинг турнирдаги кейинги иштироки ушбу ўйиндаги иши сабабли хавф остида қолиши амримаҳол. Бироқ, мамлакатлари чорак финалга чиққан ҳакамларнинг турнирдаги ишини тўхтатиши мумкин бўлган вазият юзага келиши мумкин. Шу тариқа, агар пайшанба куни Франция Марокашни мағлуб этса, икки франциялик арбитр – Летексье ва Клеман Тюрпеннинг жаҳон чемпионатидаги позициялари сусаяди.
Миср томонидан йўлланган каби сўровлар ўтган жаҳон чемпионатларида ҳам бўлган. Бироқ улар бирор бир давлатнинг шикояти асосида арбитрнинг четлатилишига олиб келмаган. Бошқа томондан, ҳакамларнинг сифатсиз иши сабабли турнирни тарк этган ҳолатлар маълум.
