- Ўйин ҳақида фикрингиз?
- Ўйинни яхши бошладик, агар ғалаба қозона олмасак гуруҳда қолиб кетишимизни билардик. Буни ҳамма яхши тушуниб турганди. Аввалги баҳсларда кўп вазият яратиб гол ура олмай келаётгандик. Лекин бугун вазиятлардан фойдалана олдик. Шу билан бирга яхши ўйин кўрсатдик деб ўйлайман.
- "Пахтакор" гуруҳдан иккинчи ўрин билан чиқди. Бу натижа амалдаги Кубок соҳиби ҳамда бир неча бор Кубок ғолиби бўлган жамоа учун қанчалик уятли?
- Бунинг уятли жойи йўқ, сабаби гуруҳдан чиқдик ва ҳали ҳаммаси олдинда. Мақсадимиз кейинги ўйинларда ҳам ғалаба қозониш.
- Агар жамоангиз кейинги босқичда "Нефтчи" билан тўқнаш келса...
- Бу ўйин, майдонга тушиб футбол ўйнаймиз.
- Иккинчи ўрин билан чиқиб 1/8 финални сафарда ўтказиш сизни қўрқитмаяптими?
- Энди вазият шунақа бўлиб қолди. Менимча, бу ҳақда ўйламаган маъқул.
- Терма жамоа якуний рўйхатига кира олмаган "Пахтакор" футболчиларининг кайфияти қанақа?
- Ўзингиз қандай деб ўйлайсиз? Барибир тушкунлик бор, футболчилар билан гаплашдик, ҳаммаси олдинда. Улар ҳали ёш, кейинчалик яна терма жамоага таклиф олишади.
- Бугун Шаҳзод Азмиддинов ўнг қанот ҳимоясида ҳаракат қилди. Балки олдин шу чизиқда ўйнагандир, лекин уни марказий ҳимоячи сифатида биламиз. Наҳотки "Пахтакор"дек жамоада ўнг қанот футболчиси йўқ?
- U-21 жамоамизда ўйнаб келаётган Бобур Каримов бор, фақат у жароҳат олди. Тўғриси, ундан бошқа захирамиз йўқ.
- Бугун Владимир Назаров дарвозани қўриқламади.
- Машғулотларда Санжар Қувватов биз билан бирга бўлди. Назаров терма жамоада эди. У яқинда сафимизга қайтди, айтиб ўтганингиздек, 30талик рўйхатга кира олмагани учун бироз тушкунлик бор. Шу боис Санжарни дарвозага қўйдик.
- Кубокнинг кейинги босқичида акангиз Зайниддин Тожиев бошқарувидаги "Ғазалкент" билан тўқнаш келишингиз мумкин. Агар шундай бўлса, бу сиз учун қанчалик қизиқ бўлади?
- Ўтган гал ҳам айтгандим: жуда қизиқарли бўлади. Буёғига ким билан тушсангиз, ҳаммаси қизиқ бўлади деб ўйлайман. Биз жиддий тайёргарлик кўришимиз керак.
